ប្រធានាធិបតីប្រទេសម៉ាលី លោក Assimi Goita បានសន្យាកាលពីថ្ងៃអាទិត្យថា នឹងបង្កើនការប្រយុទ្ធប្រឆាំងអំពើភេរវកម្ម ដោយបានបញ្ជាក់សារជាថ្មីពីការប្តេជ្ញាចិត្តរបស់លោកក្នុងការបន្តស្វែងរកសន្តិភាព សន្តិសុខ និងការអភិវឌ្ឍន៍ នៅក្នុងប្រទេស។ លោក Goita បាននិយាយបែបនេះ បន្ទាប់ពីក្បួនព្យុហយាត្រាយោធា ប្រារព្ធខួបលើកទី៦៤ នៃឯករាជ្យ របស់ប្រទេស។

លោកបាននិយាយថា «យើងនឹងតាមចាប់ខ្លួនក្រុមប្រដាប់អាវុធទាំងយប់ទាំងថ្ងៃ រហូតដល់ប្រទេសរបស់យើង រួចផុតពីការគំរាមកំហែង។

ខណៈកោតសរសើរពីការប្តេជ្ញាចិត្តរបស់ប្រជាជនម៉ាលី «ទោះបីជាមានបញ្ហាប្រឈមច្រើនក៏ដោយ» ជាអ្នកដែលនៅតែបន្តគាំទ្រយ៉ាងសកម្មដល់កងកម្លាំងប្រដាប់អាវុធប្រទេសម៉ាលី ក្នុងបេសកកម្មរបស់ពួកគេដើម្បីការពារប្រទេស លោក Goita បានបញ្ជាក់លើតម្រូវការសម្រាប់ «ការរួបរួមដ៏ពិសិដ្ឋ» ជុំវិញកងកម្លាំងការពារជាតិ និងកងកម្លាំងសន្តិសុខ ដោយបាននិយាយថា ជ័យជម្នះក្នុងការប្រយុទ្ធប្រឆាំងនេះ ទាមទារការគាំទ្រឥតឈប់ឈរពីប្រជាជន និងដៃគូ។

លោកនិយាយថា «យើងបើកចំហចំពោះដៃគូរបស់យើងទាំងអស់ ក្នុងស្មារតីនៃការគោរពគ្នាទៅវិញទៅមក និងកិច្ចសហប្រតិបត្តិការឈ្នះ-ឈ្នះ» ហើយប្រទេសម៉ាលី រួមជាមួយដៃគូរបស់ខ្លួននៅក្នុងសហព័ន្ធនៃសម្ព័ន្ធរដ្ឋ តំបន់ Sahel នឹងខិតខំប្រឹងប្រែងដើម្បីលុបបំបាត់ការគំរាមកំហែងភេរវកម្ម។