វិទ្យុកងទ័ពអ៊ីស្រាអែល បានរាយការណ៍ថា ទាហានអ៊ីស្រាអែល បានវាយលុកការិយាល័យរបស់ទូរទស្សន៍កាតា Al Jazeera នៅតំបន់វេសបែង ( West Bank)ដែលគ្រប់គ្រងដោយអ៊ីស្រាអែល កាលពីព្រឹកថ្ងៃអាទិត្យ ដោយបញ្ជាឲ្យបិទការិយាល័យនេះ។

ទូរទស្សន៍ Al Jazeera បាននិយាយនៅក្នុងសេចក្តីថ្លែងការណ៍មួយដែលបានបង្ហោះនៅលើប្រព័ន្ធផ្សព្វផ្សាយសង្គម X ថា៖«កងកម្លាំងអ៊ីស្រាអែលដែលកាន់កាំភ្លើងគ្រប់ដៃ បានចូលទៅក្នុងការិយាល័យរបស់ទូរទស្សន៍នេះ នៅទីក្រុងរ៉ាម៉ាឡា( Ramallah) ក្នុងតំបន់វេសបែង ដោយបញ្ជាឲ្យបុគ្គលិកឈប់សម្រាក និងបិទទ្វាររយៈពេល ៤៥ថ្ងៃ»។

Al Jazeera បានចាក់ផ្សាយរូបភាពវីដេអូ នៅលើប៉ុស្តិ៍ជាភាសាអារ៉ាប់របស់ខ្លួន ដែលបង្ហាញពីកងទ័ពប្រដាប់អាវុធ ខ្លះពាក់ម៉ាស់ ចូលទៅក្នុងការិយាល័យ និងប្រគល់សេចក្តីសម្រេចឲ្យបិទ។

វិទ្យុកងទ័ព បានដកស្រង់សម្តីមន្ត្រីយោធាអនាមិក ដែលនិយាយថា ការសម្រេចនេះ ត្រូវបានធ្វើឡើង «ស្របតាមការណែនាំផ្នែកនយោបាយ និងច្បាប់ បន្ទាប់ពីទូរទស្សន៍នេះ ត្រូវបានគេកំណត់ថា ការផ្សាយរបស់ខ្លួន ប៉ះពាល់ដល់សន្តិសុខរបស់រដ្ឋអ៊ីស្រាអែល»។

យោធាអ៊ីស្រាអែល មិនបានធ្វើអត្ថាធិប្បាយភ្លាមៗអំពីប្រតិបត្តិការនេះទេ។

កាលពីខែឧសភា នគរបាលអ៊ីស្រាអែល បានឆ្មក់ចូលការិយាល័យរបស់ទូរទស្សន៍ Al Jazeera នៅក្នុងក្រុងហ្ស៊េរុយសាឡឹមខាងកើត ដោយរឹបអូសឧបករណ៍ផ្សេងៗ បិទការផ្សាយក្នុងប្រទេសអ៊ីស្រាអែល និងបិទគេហទំព័ររបស់ខ្លួន។