អ៊ីរ៉ង់៖ ​ក្រុម​ឃ្លាំមើល​នុយក្លេអ៊ែរ​របស់​អង្គការសហប្រជាជាតិ​ បាន​និយាយ​កាលពី​ថ្ងៃអាទិត្យ​ ទី២៦ ខែ​កញ្ញា​ថា ​អ៊ីរ៉ង់​បាន​បរាជ័យ​ក្នុង​ការ​គោរព​យ៉ាង​ពេញលេញ​ នូវ​លក្ខខណ្ឌ​នៃ​កិច្ចព្រមព្រៀង​ដែល​បាន​ធ្វើឡើង​កាលពី​ពីរ​សប្ដាហ៍​មុន​ ដើម្បី​អនុញ្ញាត​ឱ្យ​ក្រុម​អធិការកិច្ច​របស់​អង្គការ​ឃ្លាំមើល​នេះ​ចុះ​ត្រួតពិនិត្យ​ឧបករណ៍​នៅ​ក្នុង​ប្រទេស​។​

​ទីភ្នាក់ងារ​ថាមពល​អា​តូ​មិ​ក​អន្តរជាតិ (IAEA) បាន​និយាយ​នៅ​ក្នុង​សេចក្ដីថ្លែងការណ៍​មួយ​ថា ប្រធាន​ទីភ្នាក់ងារ​នេះ លោក Rafael Grossi បាន​សង្កត់​ធ្ងន់​ថា​ ការសម្រេចចិត្ត​របស់​អ៊ីរ៉ង់​មិន​អនុញ្ញាត​ឱ្យ​ទីភ្នាក់ងារ​ ចូល​ទៅ​ក្នុង​ទីតាំង​ផលិត​ចំណែក​ផ្សំម៉ាស៊ីន​សែន​ទ្រី​ផ្យូ​ច​ (centrifuge TESA Karaj) ​ផ្ទុយ​ទៅ​នឹង​លក្ខខណ្ឌ​ដែល​បាន​ព្រមព្រៀងគ្នា ​នៅ​ក្នុង​សេចក្តី​ប្រកាស​រួម​ដែល​បាន​ផ្សព្វផ្សាយ​កា​ល​ពី​ថ្ងៃ​ទី១២ ខែ​កញ្ញា​។ ​កិច្ចព្រមព្រៀង​ថ្ងៃទី​១២ ខែ​កញ្ញា​ដែល​សម្រេច​បាន​នៅមុន​កិច្ចប្រជុំ​ក្រុមប្រឹក្សាភិបាល ៣៥​ប្រទេស​របស់​ទីភ្នាក់ងារ IAEA មានន័យថា ​មហាអំណាច​លោក​ខាង​លិច​ជ្រើសរើស​ មិន​ស្វែងរក​សេចក្ដី​សម្រេច​រិះគន់​អ៊ីរ៉ង់​នៅ​ក្នុង​កិច្ចប្រជុំ​នោះ​ទេ ព្រោះ Memory cards របស់​ឧបករណ៍​នោះ​នឹង​ត្រូវ​បាន​ជំនួស​ដូចដែល​ពួកគេ​ចង់បាន​។

​សេចក្ដី​សម្រេច​មួយ​អាច​សម្លាប់​ក្ដី​សង្ឃឹម​ នៃ​ការ​បន្ត​ការពិភាក្សា​ទូលំទូលាយ​ឡើងវិញ​ស្តីពី​ការ​ស្រោចស្រង់​កិច្ចព្រមព្រៀង​នុយក្លេអ៊ែរ​អ៊ីរ៉ង់។ ​ប្រធានាធិបតី​ថ្មី​ប្រកាន់​តឹង ​លោក Ebrahim Raisi បាន​និយាយ​ថា ​អ៊ីរ៉ង់​បាន​ត្រៀមខ្លួន​វិលត្រឡប់​ទៅ​រក​តុ​ចរចា​វិញ ប៉ុន្តែ​មិន​ស្ថិត​ក្រោម​សម្ពាធ​របស់​លោក​ខាងលិច​ទេ​៕

អត្ថបទ៖ សុខមាន