ប្រណាំង​រថយន្ត៖ ​ជើងឯក​ប្រណាំង F1 ពិភពលោក ៧សម័យ Lewis Hamilton បាន​ប្រជែង​ឈ្នះ​ការប្រកួត​នៅ​ប្រទេស​រុស្ស៊ីដែលជា​ជ័យជំនះ​សរុប​ចំនួន ១០០ទីលាន​ក្នុង​អាជីព​របស់គេ​។ កីឡាករ​អង់គ្លេស​រូបនេះរួម​ជាមួយនឹង​គូប្រជែង Max Verstappen មិន​ស្ថិតនៅ​ជួរមុខ​គេ​ឡើយនៅពេល​ចេញ​ដំណើរ ខណៈ​កត្តា​អាកាសធាតុ​ដែលមាន​ភ្លៀង​ធ្លា​ក់នៅ ៥ជុំ​ចុងក្រោយ​ធ្វើឱ្យ Hamilton ឆក់យក​ជ័យជំនះ​នេះ​។

​​ចាប់​ផ្តើមដំបូង Lando Norris របស់​ក្រុម McLaren ចេញដំណើរ​មុខ​គេ តែ​កីឡាករ​អេ​ស្ប៉ា​ញ Carlos Sainz ក៏​វ៉ា​ផុត​ និង​នាំមុខគេ​វិញ​។ ​បន្ទាប់ពី​មានការ​ប្រជែង​គ្នា​ខ្លាំង Lando Norris ក៏​ឡើងមក​នាំមុខគេ​វិញ ស្របពេល Lewis Hamilton បាន​ដេញ​ពីក្រោយ​រហូតដល់​លេខ២ ប្រដេញ​ពីក្រោយ Lando Norris ប្រកៀក​ប្រកិត​។​ ​ការព្យាករណ៍​អាកាសធាតុ​ថា​ មាន​ភ្លៀង​ធ្លាក់​នោះ Hamilton ក៏​ចូល Pit Stop ផ្លាស់ប្តូរ​កង់​បណ្តោយឱ្យ Norris បន្ត​ការ​នាំមុខ​។

លុះ​ពេល​ភ្លៀង​ធ្លាក់​ខ្លាំង Lando Norris ដែល​មិនទាន់​ផ្លាស់​កង់​នោះ​ក៏​រអិល​ចេញពី​ផ្លូវ​បណ្តាល​ឱ្យ Hamilton ឡើងមក​នាំមុខ​វិញ​ជាមួយ Max Verstappen លេខ២ រហូត​ដល់ទី​ព្រ័ត្រ ខណៈ​កីឡាករ​របស់ Ferrari, Carlos Sainz បាន​លេខ៣​។ ជ័យជំនះ​ទីលាន​ទី ១០០ ក្នុង​អាជីព​របស់ Hamilton នេះ​ធ្វើ​ឱ្យគេ​ឡើងមក​នាំមុខគេ​ក្នុង​តារាង​ជើងឯក​ពិភពលោកវិញ​ដោយ​នាំមុខ​គូប្រជែង Max Verstappen របស់​ក្រុម Red Bull ចំនួន ២ពិន្ទុ​។ ​បន្ទាប់ពី​រុស្ស៊ី​នេះ F1 នឹង​បន្តដំណើរ​ទៅ​ទឹកដី​ទួ​រគី​ថ្ងៃទី១០ ខែតុលា​៕

​អត្ថបទ​៖​នាង សុភា​វុ​ធ