ប្រជាពលរដ្ឋស្រីលង្កា បង្ហាញភាពសប្បាយរីករាយរបស់ពួកគេ ចំពោះការជ្រើសរើសលោក Anura Kumara Dissanayake ជាប្រធានាធិបតីថ្មីកាលពីថ្ងៃអាទិត្យ ដោយពួកគេដាក់ជំនឿលើការសន្យារបស់លោកថា នឹងប្រយុទ្ធប្រឆាំងអំពើពុករលួយ ហើយនិងពង្រឹងការងើបឡើងវិញសេដ្ឋកិច្ចដ៏ផុយស្រួយ បន្ទាប់ពីវិបត្តិហិរញ្ញវត្ថុដ៏អាក្រក់បំផុតរបស់ប្រទេសនៅអាស៊ីខាងត្បូងមួយនេះ ក្នុងរយៈពេលជាច្រើនទសវត្សរ៍កន្លងមកនេះ ។

លោក Dissanayake វ័យ ៥៥ឆ្នាំ ដែលគ្មានខ្សែស្រឡាយនយោបាយដូចជាគូប្រជែងមួយចំនួនរបស់លោក នៅក្នុងការបោះឆ្នោតជ្រើសរើសប្រធានាធិបតីនោះ បាននាំមុខចាប់ពីការចាប់ផ្តើម រហូតដល់បញ្ចប់ការរាប់សន្លឹកឆ្នោត ដោយរូបលោកបានបានផ្តួលប្រធានាធិបតីកំពុងកាន់អំណាចលោក Ranil Wickremesinghe និងមេដឹកនាំប្រឆាំងលោក Sajith Premadasa ។

លោក Dissanayakទទួលបានសំឡេងឆ្នោត ៥,៦លានសន្លឹក ឬស្មើនឹង ៤២,៣ភាគរយនៃសំឡេងឆ្នោត ពោលគឺជាសំឡេងឆ្នោតដ៏ធំសម្បើមួយ បើធៀបនឹងសំឡេងឆ្នោត ៣ភាគរយ ដែលលោកទទួលបាននៅការបោះឆ្នោតជ្រើសរើសប្រធានាធិបតីលើកមុន កាលពីឆ្នាំ ២០១៩ ។

ចំណែកឯលោក Premadasa ឈរនៅចំណាត់ថ្នាក់លេខ ២ មានសំឡេងឆ្នោត ៣២,៨ភាគរយ ។

លោក Mohammad Nafang គឺជាធនាគារិកមួយរូបនិយាយថា នេះគឺជាអ្វីដែលពួកយើងចង់បាន ។ ក្រោយរយៈពេល ៧៦ឆ្នាំដែលក្រុមអ្នកនយោបាយអាក្រក់ ធ្វើរឿងអាក្រក់មកលើប្រទេសរបស់ពួកយើង នេះហើយគឺជាការផ្លាស់ប្តូរដែលពួកយើងត្រូវការ ៕