ទូរទស្សន៍រដ្ឋ បានរាយការណ៍ថា ជនអន្តោប្រវេសន៍ ៣នាក់ បានបាត់បង់ជីវិត ហើយយ៉ាងហោចណាស់ ២៥នាក់ផ្សេងទៀត ត្រូវបានគេជឿថា កំពុងបាត់ខ្លួន បន្ទាប់ពីទូករបស់ពួកគេ បានលិច នៅថ្ងៃចន្ទ (ទី២៣ ខែកញ្ញា) នៅម្ដុំកោះ Samos របស់ប្រទេសក្រិក។

ឆ្មាំល្បាតឆ្នេរក្រិក បានប្រាប់ថា មកទល់ពេលនេះ ខ្លួនបានជួយសង្គ្រោះជនអន្តោប្រវេសន៍ចំនួន ៥នាក់ហើយ ខណៈដែលប្រតិបត្តិការស្វែងរក និងជួយសង្គ្រោះដោយនាវាឆ្មាំល្បាតឆ្នេរចំនួន ៤គ្រឿង និងឧទ្ធម្ភាគចក្រ កំពុងបន្តចេញពីឆ្នេរថ្មរបស់តំបន់ Agios Isidoros នៅភាគពាយព្យនៃកោះនេះ។

ប្រទេសក្រិក គឺជាច្រកផ្លូវដ៏ពេញនិយម ក្នុងការធ្វើដំណើរទៅកាន់សហភាពអឺរ៉ុប (EU) ពីសំណាក់ជនអន្តោប្រវេសន៍ និងជនភៀសខ្លួនមកពីតំបន់មជ្ឈិមបូព៌ា អាហ្វ្រិក និងអាស៊ី ក្នុងឆ្នាំ ២០១៥-២០១៦ នៅពេលដែលមនុស្សជិត ១លាននាក់បានទៅដល់កោះរបស់ប្រទេសនេះ ដែលភាគច្រើនធ្វើដំណើរតាមរយៈទូកពោង។ តែលំហូរមនុស្ស បានធ្លាក់ចុះ មុនពេលកើនឡើងវិញ កាលពីឆ្នាំមុន៕