អង្គការសុខភាពពិភពលោក (WHO) នៅថ្ងៃចន្ទ (ទី២៣ ខែកញ្ញា) បានឲ្យដឹងថា ការសង្ស័យជាជំងឺអុតស្វា ឬអឹមផក (Mpox) ប្រមាណជិត ៣០.០០០ករណី ត្រូវបានរាយការណ៍ នៅក្នុងទ្វីបអាហ្រ្វិក មកទល់ពេលនេះ ដោយភាគច្រើននៃករណីទាំងអស់នោះ មាននៅសាធារណរដ្ឋប្រជាធិបតេយ្យកុងហ្គោដែលសម្ភារផ្គត់ផ្គង់ពាក់ព័ន្ធនឹងការធ្វើតេស្ត បានអស់ហើយ។

ស្ថាប័នសុខភាពរបស់អង្គការសហប្រជាជាតិ (UN) មួយនេះ បានឲ្យដឹងនៅក្នុងរបាយការណ៍របស់ខ្លួនថា មនុស្សជាង ៨០០នាក់ បានស្លាប់ ដោយសង្ស័យថា ជាជំងឺ Mpox នៅទូទាំងទ្វីបនេះ នាពេលនោះ។ ស្ថាប័ននេះបានបន្ថែមថា ប្រទេសជិតខាងអាហ្វ្រិកកណ្តាលរបស់ប្រទេសកុងហ្គោ គឺប៊ូរុនឌី ក៏រងគ្រោះដោយការផ្ទុះឡើងយ៉ាងខ្លាំងក្លានៃជំងឺនេះផងដែរ។

គួរបញ្ជាក់ថា ជំងឺ Mpox អាចឆ្លងតាមរយៈការមានទំនាក់ទំនងជិតស្និទ្ធ។ ជាធម្មតាមានស្ថានភាពស្រាលប៉ុណ្ណោះ ហើយការដែលអាចបណ្ដាលឲ្យស្លាប់ គឺជាករណីកម្រ។ ជាទូទៅ ជំងឺនេះបណ្តាលឲ្យមានរោគសញ្ញា ដូចជំងឺផ្តាសាយ និងដំបៅមានខ្ទុះ នៅលើរាងកាយ។

យ៉ាងណាក្ដី សេចក្តីថ្លែងការណ៍របស់ WHO មិនបានផ្តល់តួលេខប្រៀបធៀបនឹងឆ្នាំមុនៗនោះទេ។ ចំណែកទីភ្នាក់ងារសុខភាពសាធារណៈរបស់សហភាពអាហ្រ្វិក បានឲ្យដឹងថា ការមានជំងឺចំនួន ១៤.៩៥៧ករណី និងការស្លាប់ចំនួន ៧៣៩ករណី ត្រូវបានរាយការណ៍ពីរដ្ឋចំនួន៧ ក្នុងឆ្នាំ២០២៣ ដែលជាការកើនឡើងចំនួន ៧៨,៥ភាគរយនៃករណីថ្មីពីឆ្នាំ២០២២។

តែបើយោងតាមរបាយការណ៍ WHO បានបង្ហាញថា ការសង្ស័យពីការមានជំងឺ គឺចំនួន ២៩.៣៤២ករណី ហើយមានអ្នកស្លាប់ចំនួន ៨១២នាក់ នៅទូទាំងទ្វីបអាហ្រ្វិក គិតចាប់ពីខែមករា ដល់ថ្ងៃទី១៥ ខែកញ្ញាឆ្នាំនេះ។ ជាមួយគ្នានេះ WHO បានបន្ថែមទៀតថា ការបញ្ជាក់សរុបចំនួន ២.០៨២ករណី ត្រូវបានរាយការណ៍ នៅទូទាំងពិភពលោក ក្នុងខែសីហាតែមួយ ដែលជាចំនួនខ្ពស់បំផុត គិតចាប់តាំងពីខែវិច្ឆិកា ឆ្នាំ២០២២៕