នៅថ្ងៃចន្ទនេះ ក្រសួងសុខាភិបាលលីបង់ បានចេញសេចក្តីថ្លែងការណ៍ព័ត៌មានប្រកាសពីចំនួនមនុស្សស្លាប់សរុបពីការវាយប្រហារកំពុងបន្តរបស់អ៊ីស្រាអែលលើទីក្រុងភាគខាងត្បូង និងភូមិដ្ឋានជាច្រើនទៀត កើនឡើងដល់ ១៨២នាក់ និងមនស្ស ៧២៧នាក់ផ្សេងទៀត រងរួស រួមទាំង រួមទាំងកុមារ ស្រ្តី និងគ្រូពេទ្យផងដែរ ។

ចំណែកការការធ្វើចរាចរណ៍ច្រើន ត្រូវបានគេសង្កេតឃើញមានផងដែរនៅថ្ងៃចន្ទនេះ ដោយធ្វើដំណើរឆ្ពោះទៅទិសខាងជើង ចេញពីទីក្រុងតំបន់ឆ្នេរភាគខាងត្បូង Sidon ស្របពេលដែលអ្នកស្រុកមួយចំនួន រត់ភៀសខ្លួនជាមួយទ្រព្យសម្បត្តិរបស់ពួកគេ ខណៈការទម្លាក់គ្រាប់បែករបស់អ៊ីស្រាអែល កាន់តែខ្លាំងក្លាពេញមួយថ្ងៃនេះ ។

អ៊ីស្រាអែល បានបើកការវាយប្រហារទ្រង់ទ្រាយធំបំផុតនៃរលកវាយប្រហារតាមច្រកអាកាសលើគោលដៅរបស់ក្រុមហេសប៊ូឡា នាថ្ងៃចន្ទនេះ ហើយពួកគេបានព្រមានឲ្យប្រជាពលរដ្ឋជម្លៀសខ្លួនចេញពីតំបន់ដែលពួកគេអះអាងថា ក្រុមប្រដាប់អាវុធហេសប៊ូឡា លាក់ស្តុកអាវុធរបស់ខ្លួន ។

ការវាយប្រហារនេះ កាន់តែខ្លាំងក្លាឡើង ក្រោយការផ្ទុះអាវុធឆ្លងកាត់ព្រំដែនដ៏ខ្លាំងក្លាបំផុតនៅក្នុងជម្លោះរយៈពេលជិត ១ឆ្នាំកន្លងមកនេះ ស្របពេលដែលអ៊ីស្រាអែល ងាកមកផ្តោតសំខាន់លើតំបន់ព្រំដែនភាគខាងជើងរបស់ខ្លួន ជាកន្លែងដែលក្រុមហេសប៊ូឡា ផ្លោងគ្រាប់រ៉ុក្កែតចូលទឹកដីអ៊ីស្រាអែល ដើម្បីគាំទ្រសម្ព័ន្ធមិត្តហាម៉ាស់ ដែលបានកំពុងធ្វើសង្រ្គាមជាមួយអ៊ីស្រាអែលនៅតំបន់ហ្កាហ្សា ៕