ក្រសួងការបរទេសរុស្ស៊ី បាននិយាយកាលពីថ្ងៃចន្ទ (២៣ កញ្ញា) ថា យ៉ាងហោចណាស់ជនស៊ីវិល ៥៦នាក់ ត្រូវបានសម្លាប់ និង ២៦៦នាក់ បានរងរបួសក្នុងអំឡុងពេលការលុកលុយរយៈពេល ៧សប្តាហ៍របស់អ៊ុយក្រែន ចូលទៅក្នុងតំបន់ ឃើស (Kursk) ភាគខាងលិចនៃប្រទេសរុស្ស៊ី។

ទីក្រុងគីវ បានចាប់ផ្តើមការវាយប្រហារឆ្លងព្រំដែនកាលពីថ្ងៃទី០៦ ខែសីហា រយៈពេលជាងពីរឆ្នាំបន្ទាប់ពីទីក្រុងមូស្គូ បានបញ្ជូនទាហានរាប់ម៉ឺននាក់ចូលទៅក្នុងអ៊ុយក្រែន ហើយកងកម្លាំងអ៊ុយក្រែន នៅតែស្ថិតនៅក្នុងតំបន់ Kursk។ នៅមុននោះ ក្រសួងការបរទេសរុស្ស៊ី បានដាក់ចំនួនអ្នកស្លាប់ត្រឹមតែ ៣១នាក់ប៉ុណ្ណោះក្នុងរយៈពេលដល់ថ្ងៃទី០៥ ខែកញ្ញា ប៉ុន្តែចំនួនអ្នកស្លាប់ថ្មីនេះបានគ្របដណ្តប់រយៈពេលរហូតដល់ថ្ងៃទី២០ ខែកញ្ញា។

ក្រសួងបាននិយាយថា ជនស៊ីវិល ១៣១.០០០នាក់ បានចាកចេញពីទីតាំងគ្រោះថ្នាក់បំផុតនៃតំបន់ព្រំដែននោះ ប៉ុន្តែបានចោទប្រកាន់កងកម្លាំងអ៊ុយក្រែន ថាបានឃុំខ្លួនជនស៊ីវិលមួយចំនួនប្រឆាំងនឹងឆន្ទៈរបស់ពួកគេ រួមទាំងមនុស្សចំនួន ៧០-១២០នាក់ នៅក្នុងទីក្រុង ស៊ូដហ្សា (Sudzha)។ ជាមួយគ្នានេះ អភិបាលតំបន់ Kursk លោក Alexei Smirno បាននិយាយថា មនុស្ស ៧៧០នាក់ ត្រូវបានរាយការណ៍ថាបាត់ខ្លួន ចាប់តាំងពីការលុកលុយចាប់ផ្ដើមនៅថ្ងៃ០៦ សីហា មក។

នៅពេលត្រូវសាកសួរអំពីសេចក្តីថ្លែងការណ៍នេះ អ្នកនាំពាក្យក្រសួងការបរទេសអ៊ុយក្រែន ហេអូហ៊ី ទីឃី (Heorhiy Tykhyi) បាននិយាយថា អ៊ុយក្រែនគោរពតាមច្បាប់មនុស្សធម៌អន្តរជាតិ និងមិនកំណត់គោលដៅលើជនស៊ីវិលទេ ហើយថាខ្លួនមិនទាន់អាចផ្ទៀងផ្ទាត់ការអះអាងទាំងនោះបានឡើយ៕