​វាយកូនគោល៖ ​ក្រុម​វាយកូនគោល​អាមេរិក​បានការ​ពារ​តំណែង​ជើងឯក​ព្រឹត្តិការណ៍ Ryder Cup បានសំរេច​ក្រោយ​យកឈ្នះ​ក្រុមអឺរ៉ុប​មិន​លំបាក ១៩-៩​។ ​​មុន​ឈានដល់​ថ្ងៃ​ចុងក្រោយ​ថ្ងៃអាទិត្យ​ម្សិលមិញ ក្រុម​វាយកូនគោល​អាមេរិក​ដែល​ដឹកនាំ​ដោយ​ប្រធាន​ក្រុម Steve Stricker បាន​នាំ​មុខដាច់​ក្រុម​អឺរ៉ុប​ដល់​ទៅ ១១-៥ រួចទៅហើយ​។

​​ជើងឯក The Open Championship, Collin Morikawa រកបាន​ពិន្ទុ​ដ៏​មាន​សារសំខាន់​នៅ​ប្រកួត​ទី៥ ក្នុងចំណោម ១២ប្រកួត​កាលពី​ថ្ងៃអាទិត្យ​ដោយ​យកឈ្នះ​លើ​កីឡាករ​ណ័​រវេ​យ Viktor Hovland​។ ​​ក្រុម​អឺរ៉ុប​មានតែ​កីឡាករ ៣នាក់​ប៉ុណ្ណោះ​បាន​យកឈ្នះ​គូប្រកួត​អាមេរិក​រួមមាន Rory McIlroy យកឈ្នះ Xander Schauffele ៣-២ ខណៈ Ian Poulter យកឈ្នះ Tony Finau ៣-២ និង Lee Westwood យកឈ្នះ Harris English​។​ ​​អ្នកសំរេច​ជ័យជំនះ​ចុងក្រោយ​គេ​ដើម្បី​ធានាថា​អាមេរិក​ជា​ជើងឯក​នោះ​គឺ Brooks Koepka ខណៈ​ក្រុម​អាមេរិកអបអរ​ជើង​ឯក Ryder Cup របស់ខ្លួន​នៅ​ចំពោះមុខ​អ្នកគាំទ្រ​ម្ចាស់ផ្ទះ​ប្រមាណ ៤ម៉ឺន​នាក់​។

​​សូមបញ្ជាក់ថា ព្រឹត្តិការណ៍​វាយកូនគោល Ryder Cup ត្រូវបាន​រៀបចំ​ឡើងជា​រៀងរាល់ ២ឆ្នាំម្តង​ដែល​សំរាំង​កីឡាករ​ជើង​ខ្លាំង​រវាង​សហរដ្ឋអាមេរិកប្រកួត​ជាមួយ​ក្រុម​អឺរ៉ុប រឺ PSG Tour ប្រកួត​ជាមួយ European Tour​។ ​៤៣លើក​មកហើយ​ដែល Ryder Cup ត្រូវបាន​រៀបចំឡើង ដោយ​យើង​និយាយ​តែ​ប្រវត្តិ​អាមេរិក និង​អឺរ៉ុប​នោះ​គឺអាមេរិក​ឈ្នះ​ជើងឯក​សរុប ២៧លើក និង​អឺរ៉ុប​ឈ្នះ ១១លើក​។ ឆ្នាំ២០២៣ Ryder Cup នឹង​ផ្លាស់​ទៅកាន់​ទឹកដី​អឺរ៉ុប​វិញ​ដោយ​ទីក្រុង Rome ប្រទេស​អ៊ីតាលី​គឺជា​ម្ចាស់ផ្ទះ​៕

​អត្ថបទ​៖​នាង សុភា​វុ​ធ