មេដឹកនាំប្រទេសជប៉ុន បានតវ៉ា បន្ទាប់ពីបានឃើញយន្តហោះយោធារុស្ស៊ី ហោះចូលដែនអាកាសរបស់ខ្លួន។ នាយករដ្ឋមន្ត្រី លោក Kishida Fumio កាលពីថ្ងៃចន្ទ បានទាមទារថា ការរំលោភចូលបែបនេះ កុំឲ្យកើតមានឡើងម្តងទៀត។

លោក Kishida បាននិយាយថា «យើងបានធ្វើការតវ៉ាយ៉ាងខ្លាំង តាមរយៈបណ្តាញការទូត និងបានជំរុញឱ្យរដ្ឋាភិបាលរុស្ស៊ី ទប់ស្កាត់ការកើតឡើងជាថ្មី»។ យើងប្តេជ្ញាការពារដែនដី សមុទ្រ និងដែនអាកាសរបស់យើង ហើយត្រូវប្រាកដថា យើងតាមដានស្ថានការណ៍ជាប់ជានិច្ច។

មន្ត្រីក្រសួងការពារជាតិ បាននិយាយថា យន្តហោះល្បាត IL-38 បានហោះហើរនៅជិតកោះ Rebun ក្នុងខេត្ត Hokkaido នៅម៉ោងប្រហែលមួយរសៀលម៉ោងក្នុងស្រុក ហើយក្រោយមកបានត្រឡប់មកវិញពីរដង ក្នុងរយៈពេលបីម៉ោងបន្ទាប់។ ពួកគេបាននិយាយថា ការបំពានចូលនីមួយៗ មានរយៈពេលពី ៣០ទៅ៦០វិនាទី។

មេបញ្ជាការរបស់ប្រទេសជប៉ុន បានឆ្លើយតបដោយបញ្ចេញជាបន្ទាន់យន្តហោះរបស់កងកម្លាំងស្វ័យការពារដែនអាកាស។ ពួកគេ បាននិយាយថា រុស្ស៊ី មិនបានឆ្លើយតបទៅនឹងការព្រមានតាមវិទ្យុទាក់ទងនោះទេ។ ដូច្នេះ កងកម្លាំងរបស់ប្រទេសជប៉ុន បានបាញ់ភ្លើងសញ្ញាព្រមានដាក់។

ពួកគេ បានក្លាយជាក្រុមដំបូងដែលធ្វើសកម្មភាពដូច្នេះ ចាប់តាំងពីការដាក់ចេញវិធានការដែលត្រូវបានរៀបចំ ដើម្បីឆ្លើយតបទៅនឹងការបំពានបែបនេះ។