វិមានក្រឹមឡាំង បាននិយាយកាលពីថ្ងៃចន្ទ (២៣ កញ្ញា) ថា រុស្ស៊ីនឹងសិក្សាពីអ្វីដែលប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី (Volodymyr Zelenskiy) បានដាក់ចេញថាជា “ផែនការជ័យជំនះ” របស់ខ្លួនដើម្បីបញ្ចប់សង្រ្គាមជាមួយរុស្ស៊ី និងនៅពេលដែលព័ត៌មានផ្លូវការស្តីពីផែនការនេះត្រូវបានចេញផ្សាយ។

លោក Zelenskiy គ្រោងនឹងបង្ហាញផែនការនោះដល់ប្រធានាធិបតីអាមេរិក លោក Joe Biden នៅសប្តាហ៍នេះ និងអ្នកស្នងតំណែងដ៏មានសក្តានុពលចំនួនពីររូបរបស់លោកគឺលោកស្រី Kamala Harris និងលោក Donald Trump ក្នុងអំឡុងដំណើរទស្សនកិច្ចទៅកាន់សហរដ្ឋអាមេរិក ដែលមើលឃើញលោក Zelenskiy ថ្លែងសុន្ទរកថានៅឯមហាសន្និបាតអង្គការសហប្រជាជាតិ UNGA នៅថ្ងៃអង្គារ (២៤ កញ្ញា) នេះ។

ផែនការ ដែលលោក Zelenskiy រហូតមកដល់ពេលនេះមិនបានផ្សព្វផ្សាយលម្អិតជាសាធារណៈនោះ ហាក់ដូចជាការជំរុញដ៏ធំមួយពីប្រធានាធិបតីអ៊ុយក្រែនរូបនេះដើម្បីព្យាយាមបញ្ចុះបញ្ចូលទីក្រុងវ៉ាស៊ីនតោន និងសម្ព័ន្ធមិត្តផ្សេងទៀត ឱ្យផ្តល់ជំនួយបន្ថែមទៀតដល់ប្រទេសរបស់លោក ក្នុងកិច្ចខិតខំប្រឹងប្រែងដើម្បីបង្ខំទីក្រុងមូស្គូ ឱ្យបញ្ចប់ជម្លោះនៅលើ លក្ខខណ្ឌដែលអាចទទួលយកបានសម្រាប់ទីក្រុងគីវ។

ក្រុមមន្ត្រីអ៊ុយក្រែនបានបង្ហើបថា នៅទីបំផុតរុស្ស៊ី អាចនឹងត្រូវអញ្ជើញឱ្យចូលរួមក្នុងកិច្ចប្រជុំកំពូលមួយដើម្បីពិភាក្សាអំពីដំណោះស្រាយចំពោះជម្លោះក្រោមផែនការសន្តិភាពថ្មីនោះ។ នៅពេលត្រូវសាកសួរអំពីគំនិតផ្តួចផ្តើមរបស់លោក Zelenskiy អ្នកនាំពាក្យវិមានក្រឹមឡាំង លោក ឌីមីទ្រី ផេស្កូវ (Dmitry Peskov) បានប្រាប់អ្នកយកព័ត៌មានថា “ប្រសិនបើព័ត៌មានអំពីផែនការនោះលេចឡើងនៅក្នុងប្រភពផ្លូវការ យើងនឹងពិនិត្យមើល»៕