ក្រុមហ៊ួទីនៅប្រទេសយេម៉ែនកាលពីថ្ងៃចន្ទ បានសន្យាគាំទ្ររបស់ខ្លួនចំពោះក្រុមប្រដាប់អាវុធរបស់លីបង់ ហេសបូឡា ក្នុងជម្លោះដែលកំពុងបន្តជាមួយអ៊ីស្រាអែល។

លោក ម៉ូហាម៉េដ អាប់ឌុល សាឡាម ( Mohamed Abdul-Salam) អ្នកនាំពាក្យរបស់ក្រុមហ៊ួទី បាននិយាយតាមរយៈទូរទស្សន៍ al-Masirah របស់ក្រុមនេះថា៖«យើងសូមបញ្ជាក់ជាថ្មីថា យេម៉ែនបន្តគាំទ្រ លីបង់ និងការតស៊ូអ៊ីស្លាមដ៏អង់អាចក្លាហានរបស់ខ្លួន» ដោយថ្កោលទោសចំពោះការឈ្លានពានរបស់ អ៊ីស្រាអែលប្រឆាំងនឹងប្រទេសលីបង់។ 

អ្នកនាំពាក្យក្រុមហ៊ួទី ក៏បានអំពាវនាវឲ្យមានការចូលរួមក្នុងតំបន់កាន់តែទូលំទូលាយ ដោយជំរុញឲ្យប្រទេសផ្សេងទៀតនៅក្នុងតំបន់ ធ្វើសកម្មភាពកាន់តែសកម្មឡើង ក្នុងការថ្កោលទោសការវាយប្រហាររបស់អ៊ីស្រាអែល។ លោកបាននិយាយថា៖«យើងអំពាវនាវដល់ប្រទេសអារ៉ាប់ និងរដ្ឋឥស្លាមឲ្យឈប់បន្តភាពស្ងៀមស្ងាត់តទៅទៀត។

កាលពីថ្ងៃសុក្រសប្តាហ៍មុន រដ្ឋមន្ត្រីការពារជាតិហ៊ួទីរបស់ប្រទេសយេម៉ែន លោក ម៉ូហាម៉េដ ណាស់សឺ   អាល់ អាទីហ្វី ( Mohammed Nasser al-Atifi) បាននិយាយនៅក្នុងសុន្ទរកថាតាមទូរទស្សន៍ថា ក្រុម  ហ៊ួទី នឹងបន្តការវាយប្រហាររបស់ខ្លួនប្រឆាំងនឹងអ៊ីស្រាអែល ដោយបញ្ជាក់ថា៖«យើងនឹងមិនបញ្ឈប់រហូតដល់ការឈ្លានពានលើតំបន់ហ្កាហ្សាត្រូវបានបញ្ចប់»។