សារព័ត៌មាន The Guardian បានរាយការណ៍ថា នៅខាងក្រៅមហាសន្និបាតអង្គការសហប្រជាជាតិ នាទីក្រុងញូវយ៉ក សហរដ្ឋអាមេរិក ប្រធានាធិបតីអ៊ីរ៉ង់ លោក Masoud Pezeshkian កាលពីថ្ងៃចន្ទ (ទី២៣ ខែកញ្ញា) បានអះអាងថា ប្រទេសរបស់លោកមិនដែលគាំទ្រការលុកលុយរបស់រុស្ស៊ីលើអ៊ុយក្រែននោះឡើយ ហើយក៏បានបដិសេធថា មិនបានផ្គត់ផ្គង់មីស៊ីលបាលីស្ទិកដល់រុស្ស៊ីនោះដែរ។

កាលពីថ្ងៃទី១០ ខែកញ្ញា តាមរយៈសេចក្ដីរាយការណ៍លើបណ្ដាញសារព័ត៌មានមុននេះ ទីក្រុងវ៉ាស៊ីនតោន បានបញ្ជាក់អះអាងថា រុស្ស៊ីបានទទួលការដឹកជញ្ជូនមីស៊ីលបាលីស្ទិករយៈចម្ងាយជិតប្រភេទ Fath-360 របស់អ៊ីរ៉ង់។ នៅមួយថ្ងៃមុននោះ អ៊ីរ៉ង់បានបដិសេធថា ខ្លួនមិនបានបញ្ជូនមីស៊ីលបាលីស្ទិកទៅឲ្យរុស្ស៊ីនោះទេ ដោយអះអាងថា របាយការណ៍ដែលកំពុងបន្តមាននេះ គឺជា «សង្គ្រាមចិត្តសាស្ត្រ»។

លោក Pezeshkian បានអះអាងនៅឯទីក្រុងញូវយ៉កថា៖ «យើងមានឆន្ទៈក្នុងការអង្គុយជាមួយអឺរ៉ុប និងអាមេរិក ដើម្បីធ្វើការសន្ទនា និងការចរចាគ្នា។ យើងមិនដែលបង្ហាញការពេញចិត្ត ឬគាំទ្រ ចំពោះការលុកលុយរបស់រុស្ស៊ីចូលដែនដីអ៊ុយក្រែននោះឡើយ»។

លោក Pezeshkian បានក្លាយជាប្រធានាធិបតីរបស់អឺរ៉ុង់ នៅថ្ងៃទី៣០ ខែសីហា ឆ្នាំ២០២៤។ ហើយក្នុងអំឡុងពេលធ្វើសន្និសីទសារព័ត៌មានដំបូងរបស់លោក បន្ទាប់ពីបានចូលកាន់តំណែង លោកក៏បានបដិសេធថា មិនបានផ្គត់ផ្គង់មីស៊ីលបាលីស្ទិកទៅឲ្យរុស្ស៊ីដែរ។ លោក Pezeshkian បាននិយាយថា៖ «ប្រហែលជាមានការដឹកជញ្ជូនបែបនេះ កាលពីអតីតកាល។ ប៉ុន្តែខ្ញុំអាចធានាអ្នកថា មិនមានការដឹកជញ្ជូនបែបនេះទៅរុស្ស៊ីនោះឡើយ ចាប់តាំងពីខ្ញុំចូលកាន់តំណែង»។

ទាំងអ៊ុយក្រែន សហភាពអឺរ៉ុប និងសហរដ្ឋអាមេរិក បានដាក់ទណ្ឌកម្មបន្ថែមទៀតប្រឆាំងនឹងអ៊ីរ៉ង់ បន្ទាប់ពីមានការបញ្ជាក់អំពីការបញ្ជូនមីស៊ីលទៅឲ្យរុស្ស៊ី៕