វាយសី៖ ក្រុមជម្រើសជាតិកីឡាវាយសីកម្ពុជា នឹងធ្វើការបោះជុំរុំហ្វឹកហាត់លក្ខណៈបិទខ្ទប់ នៅពហុកីឡដ្ឋានជាតិមរតកតេជោនាថ្ងៃទី០១ ខែតុលា ឆ្នាំ២០២១ ចុងសប្ដាហ៍នេះដើម្បីពង្រឹងសមត្ថភាព និងបច្ចេកទេសត្រៀមការប្រកួតអន្ដរជាតិនានា ពិសេសដំណើរឆ្ពោះទៅស៊ីហ្គេមឆ្នាំ២០២៣ នៅកម្ពុជា។
ឯកឧត្តមឧត្តមសេនីយ៍ទោ ជាម សុភា អគ្គលេខាធិការសហព័ន្ធកីឡាវាយសីកម្ពុជាបានឲ្យដឹងថា កីឡាករ-កីឡាការិនីជម្រើសជាតិរបស់ខ្លួន នឹងធ្វើការប្រមូលផ្ដុំលក្ខណៈបិទខ្ទប់តាមការណែនាំរបស់ក្រសួងអប់រំ យុវជន និងកីឡា ក៏ដូចជាគណៈកម្មាធិការជាតិ CAMSOC ដើម្បីធានាសុវត្ថិភាព និងបង្ការជំងឺកូវីដ-១៩ ផង និងពង្រឹងសមត្ថភាពត្រៀមដំណើរឆ្ពោះទៅស៊ីហ្គេមផង។ ទន្ទឹមជាមួយការត្រៀមប្រមូលផ្ដុំហ្វឹកហាត់នាដើមខែក្រោយនេះ ឯកឧត្តម ជាម សុភា ក៏បាននាំយកនូវអំណោយរបស់ប្រធានសហព័ន្ធឯកឧត្ដមឧត្តមសេនីយ៍ឯក លី កុសល ឧបត្ថម្ភដល់ក្រុមជម្រើសជាតិតាមរយៈគ្រូបង្វឹកលោក សំ ប៊ុនណារិទ្ធ សម្រាប់បម្រើឲ្យការហ្វឹកហាត់នាពេលឆាប់ៗខាងមុខផងដែរ រួមមានគ្រាប់សីចំនួន ១កេសស្មើនឹង ៥០បំពង់, ម៉ាស៊ីនវ៉ាស់កម្ដៅ ១គ្រឿង រួមទាំងអាល់កុល ម៉ាស់ និងសម្ភារៈមួយចំនួនទៀតដែលសរុបជាថវិកាប្រមាណ ៧០០ដុល្លារ។
លោក សំ ប៊ុនណារិទ្ធ គ្រូបង្វឹកក្រុមជម្រើសជាតិកីឡាវាយសីកម្ពុជា ក្នុងនាមតំណាងកីឡាករ-កីឡាការិនីទាំងអស់បានថ្លែងអំណរគុណ ចំពោះថ្នាក់ដឹកនាំសហព័ន្ធពិសេសលោកឧត្តមសេនីយ៍ឯក លី កុសល ដែលតែងយកចិត្តទុកដាក់សួរសុខទុក្ខ និងលើកទឹកចិត្តដល់គ្រូបង្វឹក និងកីឡាករ-កីឡាការិនីទាំងអស់ ហើយតែងឧបត្ថម្ភជាប្រចាំនូវសម្ភារៈហ្វឹកហាត់ ដើម្បីជំរុញឲ្យក្រុមជម្រើសជាតិទទួលបានភាពកក់ក្ដៅ និងខិតខំប្រឹងប្រែងហ្វឹកហាត់បន្ថែមទៀត។ ចំពោះក្រុមជម្រើសជាតិកីឡាវាយសី ដែលត្រៀមប្រមូលផ្ដុំហ្វឹកហាត់លក្ខណៈបិទខ្ទប់រយៈពេល ៣ខែនៅពហុកីឡដ្ឋានជាតិមរតកតេជោគឺមានចំនួន ២១នាក់ក្នុងនោះកីឡាករ-កីឡាការិនី ១៦នាក់ (ស្រី ៣នាក់) រួមទាំងគ្រូបង្វឹក និងគ្រូជំនួយខ្មែរ ៤នាក់រួមទាំងគ្រូបង្វឹកបរទេសម្នាក់៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
