ប្រធានគោលនយោបាយការបរទេសរបស់សហភាពអឺរ៉ុប កាលពីថ្ងៃចន្ទ (ទី២៣ ខែកញ្ញា) បានលើកឡើងថា ប្រទេសរុស្ស៊ីកំពុងព្យាយាមបំផ្លាញហេដ្ឋារចនាសម្ព័ន្ធថាមពលរបស់អ៊ុយក្រែន នៅមុនរដូវរងា ដើម្បីធ្វើឲ្យប្រទេសនេះស្ថិតក្នុងភាពងងឹត និងត្រជាក់ ដោយនិយាយថា សម្ព័ន្ធមិត្តលោកខាងលិចរបស់ទីក្រុងគីវ ត្រូវបង្កើនជំនួយផ្នែកការការពារដែនអាកាស សម្រាប់អ៊ុយក្រែន។

ចាប់តាំងពីមានការលុកលុយពេញលេញរបស់រុស្ស៊ី ក្នុងខែកុម្ភៈ ឆ្នាំ២០២២ ប្រព័ន្ធថាមពលរបស់អ៊ុយក្រែនត្រូវ បានកំណត់គោលដៅវាយប្រហារ ដែលបណ្តាលឲ្យមានការដាច់ចរន្តអគ្គិសនី និងការផ្គត់ផ្គង់ថាមពលមានកម្រិតទៅកាន់តំបន់មួយចំនួន ក្នុងរយៈពេលជាច្រើនម៉ោង ក្នុងមួយថ្ងៃ។ ហើយការវាយប្រហារទាំងនោះបានកើនឡើងក្នុងប៉ុន្មានសប្តាហ៍ថ្មីៗនេះមុនរដូវរងា។

នៅក្នុងរបាយការណ៍មួយដែលបានចេញផ្សាយកាលពីថ្ងៃព្រហស្បតិ៍សប្ដាហ៍កន្លងទៅ ទីភ្នាក់ងារថាមពលអន្តរជាតិ បានឲ្យដឹងថា កង្វះការផ្គត់ផ្គង់អគ្គិសនីរបស់ប្រទេសអ៊ុយក្រែន អាចឈានដល់ ៦ជីហ្គាវ៉ាត់ ក្នុងរដូវរងារនេះ ពោលគឺប្រហែល ១ភាគ៣នៃតម្រូវការខ្ពស់បំផុត ដែលត្រូវបានរំពឹងទុក។

នៅឯសន្និសីទសារព័ត៌មាន នាទីក្រុងញូវយ៉ក សហរដ្ឋអាមេរិក លោក Josep Borrell បានប្រាប់អ្នកសារព័ត៌មានថា៖ «វាច្បាស់ណាស់ថា រុស្ស៊ីចង់ធ្វើឲ្យអ៊ុយក្រែនស្ថិតនៅក្នុងភាពងងឹត និងត្រជាក់។ រដូវរងាកំពុងជិតមកដល់ហើយ ហើយបន្ទាប់ពីមានការវាយប្រហាររបស់រុស្ស៊ីលើគោលដៅថាមពល សមត្ថភាពផលិតថាមពលរបស់អ៊ុយក្រែន ត្រូវបានកាត់បន្ថយ ២ភាគ៣»។



លោក Borrell បាននិយាយ បន្ទាប់ពីរដ្ឋមន្ត្រីការបរទេសសហភាពអឺរ៉ុប និងមុននេះ រដ្ឋមន្ត្រីរបស់ក្រុមប្រទេស G7 បានជួបពិភាក្សាជាមួយមន្ត្រីអ៊ុយក្រែន ក្នុងនោះរួមទាំងរដ្ឋមន្ត្រីការបរទេស លោក Andrii Sybiha ផងដែរ ដើម្បីពិភាក្សាអំពីវីធីជួយអ៊ុយក្រែន ក្នុងប៉ុន្មានសប្តាហ៍ខាងមុខនេះ៕