ប្រទេសទួរគី បានប្រកាសកាលពីថ្ងៃចន្ទថា ខ្លួននឹងបង្ហាញភ័ស្តុតាងពាក់ព័ន្ធនឹងការសម្លាប់ស្ត្រីជនជាតិអាមេរិកដើមកំណើតទួរគីម្នាក់ ដោយកងកម្លាំងអ៊ីស្រាអែល នៅតំបន់វេសបែងដែលគ្រប់គ្រងដោយអ៊ីស្រា   អែល ទៅកាន់តុលាការយុត្តិធម៌អន្តរជាតិ (ICJ) និងតុលាការឧក្រិដ្ឋកម្មអន្តរជាតិ (ICC)។

នាង អាយស៊ីណូ អេហ្គី (Aysenur Ezgi Eygi)អាយុ ២៦ឆ្នាំ ត្រូវគេបាញ់ ក្នុងអំឡុងពេលតវ៉ាប្រឆាំងនឹងការតាំងទីលំនៅរបស់អ៊ីស្រាអែលនៅជិតភូមិប៉ាឡេស្ទីន Beita និងបានស្លាប់ដោយសាររបួសរបស់ខ្លួន កាលពីថ្ងៃទី៦ ខែកញ្ញា។  

រដ្ឋមន្ត្រីក្រសួងយុត្តិធម៌ទួរគី លោក យីលម៉ាស ធុន  (Yilmaz Tunc) បាននិយាយថា៖«យើងនឹងបង្ហាញរបាយការណ៍កោសល្យវិច័យលើនាង អេហ្គី និងបញ្ជូនភ័ស្តុតាងបន្ថែមទៀតទៅកាន់តុលាការ ICJ ។ លើសពីនេះ យើងនឹងផ្តល់ភ័ស្តុតាងសម្រាប់ការស៊ើបអង្កេត ដែលកំពុងបន្តនៅតុលាការ ICC ទាក់ទងនឹងអ្នកឈ្លានពានអ៊ីស្រាអែល» ដោយពុំបានបញ្ជាក់ពីពេលវេលាកំណត់ឡើយ។

នាង អេហ្គី ត្រូវបានសម្លាប់ ក្នុងអំឡុងពេលការហែក្បួនតវ៉ាជាប្រចាំដោយសកម្មជន នៅទីប្រជុំជន Beita នៅក្បែរទីក្រុង Nablus ដែលជាញឹកញាប់ត្រូវបានកំណត់គោលដៅ ដោយអ្នកតាំងលំនៅជនជាតិជ្វីហ្វ។

ជាការឆ្លើយតប កងកម្លាំងការពារអ៊ីស្រាអែល (IDF) បានអះអាងថា កងកម្លាំងរបស់ខ្លួន «បានឆ្លើយតបដោយការបាញ់ប្រហារឆ្ពោះទៅរកអ្នកញុះញង់សំខាន់នៃសកម្មភាពហិង្សាដែលបានគប់ដុំថ្ម ទៅលើកងកម្លាំង និងបង្កការគំរាមកំហែងដល់ពួកគេ។ IDF បានបន្ថែមថា ខ្លួនកំពុងស៊ើបអង្កេតរបាយការណ៍អំពីការស្លាប់របស់ជនបរទេសម្នាក់។