នៅក្នុងបទសម្ភាសន៍មួយដែលត្រូវបានចេញផ្សាយ នាព្រឹកថ្ងៃអង្គារ (ទី២៤ ខែកញ្ញា) នេះ ប្រធានទីភ្នាក់ងារនុយក្លេអ៊ែររបស់អង្គការសហប្រជាជាតិ លោក Rafael Grossi បាននិយាយថា នៅតែមានស្ថានភាពធ្ងន់ធ្ងរ ជុំវិញរោងចក្រថាមពលនុយក្លេអ៊ែរ Kursk របស់រុស្ស៊ី ប៉ុន្តែទីភ្នាក់ងាររបស់លោក មិនមានគម្រោងធ្វើបេសកកម្មអចិន្ត្រៃយ៍ នៅកន្លែងនោះទេ។

គួរបញ្ជាក់ថា ទាហានអ៊ុយក្រែននៅតែស្ថិត ក្នុងតំបន់ Kursk ភាគខាងត្បូងនៃប្រទេសរុស្ស៊ី បន្ទាប់ពីបានវាយប្រហារឆ្លងកាត់ព្រំដែនចូលទៅក្នុងតំបន់នេះ កាលពីខែមុន ប៉ុន្តែនៅតែមានទីតាំងចម្ងាយប្រហែល ៤០គីឡូម៉ែត្រពីកន្លែងនោះ។

លោក Grossi អគ្គនាយកនៃទីភ្នាក់ងារថាមពលបរមាណូអន្តរជាតិ (IAEA) បានប្រាប់សារព័ត៌មាន RIA របស់រុស្ស៊ីថា៖ «(ស្ថានការណ៍) គឺធ្ងន់ធ្ងរដែលការលុកលុយផ្នែកយោធា បានកើតឡើង ហើយការលុកលុយនោះបានឈានដល់ដំណាក់កាលដែលវានៅមិនឆ្ងាយពីស្ថានីយ៍ថាមពលនុយក្លេអ៊ែរនេះ»។

លោក Grossi បានទៅមើលរោងចក្រ Kursk ដែលមានម៉ាស៊ីនរ៉េអាក់ទ័រចំនួន ៤ កាលពីខែមុន ហើយបាននិយាយថា វានឹង «ស្ថិតនៅក្នុងហានិភ័យមានមហន្តរាយខ្ពស់» ប្រសិនបើរងការវាយប្រហារ ដោយសាររោងចក្រនេះមិនមានរចនាសម្ព័ន្ធការពារឡើយ៕