អង្គការសហប្រជាជាតិ (UN) នៅថ្ងៃអង្គារ (ទី២៤ ខែកញ្ញា) នេះ បាននិយាយថា មនុស្សរាប់ម៉ឺននាក់ បានភៀសខ្លួនចេញពីផ្ទះសម្បែងរបស់ពួកគេ នៅក្នុងប្រទេសលីបង់ ចាប់តាំងពីថ្ងៃចន្ទ (ទី២៣ ខែកញ្ញា) ក្នុងពេលមានការវាយប្រហារពីអ៊ីស្រាអែល។

អ្នកនាំពាក្យទីភ្នាក់ងារជនភៀសខ្លួនរបស់ UN គឺលោក Matthew Saltmarsh បានប្រាប់អ្នកសារព័ត៌មាននៅទីក្រុងហ្សឺណែវ ប្រទេសស្វីសថា៖ «យើងមានការព្រួយបារម្ភយ៉ាងខ្លាំង អំពីការកើនឡើងយ៉ាងខ្លាំងក្លា នៅក្នុងការវាយប្រហារដែលយើងបានឃើញ កាលពីម្សិលមិញ។ លោកបានបន្ថែមថា៖ «មនុស្សរាប់ម៉ឺននាក់ ត្រូវបានបង្ខំចិត្តចាកចេញពីផ្ទះសម្បែងរបស់ពួកគេ កាលពីម្សិលមិញ និងពេញមួយយប់ ហើយចំនួននៅតែបន្តកើនឡើងជាលំដាប់»។

គួរបញ្ជាក់ថា បើយោងតាមក្រសួងសុខាភិបាលរបស់លីបង់ បានឲ្យដឹងថា ការវាយប្រហារតាមអាកាសរបស់អ៊ីស្រាអែល បានសម្លាប់មនុស្សយ៉ាងហោចណាស់ ៤៩២នាក់ កាលពីថ្ងៃចន្ទ ក្នុងនោះមានទាំងកុមារ ៣៥នាក់ផងដែរ ដែលធ្វើឲ្យហេតុការណ៍នេះក្លាយជាការទម្លាក់គ្រាប់បែកបង្ហូរឈាមបំផុត ក្នុងរយៈពេលជិត ២ទសវត្សរ៍។

គូសត្រូវដ៏យូរអង្វែង គឺក្រុមហេសបូឡា និងអ៊ីស្រាអែល បានជាប់នៅក្នុងការការបាញ់ប្រហារដាក់គ្នាឆ្លងព្រំដែនស្ទើររៀងរាល់ថ្ងៃ ចាប់តាំងពីក្រុមសកម្មប្រយុទ្ធហាម៉ាសប៉ាឡេស្ទីន បានធ្វើការវាយប្រហារដែលមិនធ្លាប់មានពីមុនមកលើអ៊ីស្រាអែល កាលពីថ្ងៃទី៧ ខែតុលាឆ្នាំមុន។

ហើយការទម្លាក់គ្រាប់បែកកាលពីថ្ងៃចន្ទលើលីបង់ គឺមិនត្រឹមតែជាហេតុការណ៍ធ្ងន់ធ្ងរបំផុតបើធៀបនឹងឆ្នាំមុនប៉ុណ្ណោះទេ ប៉ុន្តែគឺធំបំផុត គិតចាប់តាំងពីមានសង្គ្រាម រវាងអ៊ីស្រាអែល និងក្រុមសកម្មប្រយុទ្ធដែលគាំទ្រដោយអ៊ីរ៉ង់មួយនេះ នៅរដូវក្តៅឆ្នាំ២០០៦៕