ទីភ្នាក់ងារព័ត៌មានរដ្ឋកូរ៉េខាងជើង KCNAបានរាយការណ៍នៅថ្ងៃអង្គារនេះថា លោកស្រី Kim Yo Jong ដែលប្អូនស្រីបង្កើតដ៏មានអំណាចរបស់មេដឹកនាំកូរ៉េខាងជើងលោក Kim Jong Un បានរិះគន់វត្តមានរបស់នាវាមុជទឹកនុយក្លេអ៊ែររបស់សហរដ្ឋអាមេរិកនៅកំពង់ក្រុង Busan របស់កូរ៉េខាងត្បូង ។

យោងតាម KCNAបានឲ្យដឹងថា លោកស្រី Kim បានចាត់ទុកវាថាជាភស្តុតាងនៃមហិច្ឆិតាសហរដ្ឋអាមេរិក ក្នុងការនាំយកទ្រព្យសម្បត្តិយុទ្ធសាស្ត្រនុយក្លេអ៊ែររបស់ខ្លួន បង្ហាញកម្លាំងរបស់ខ្លួន បង្កើនការគំរាមកំហែងរបស់ខ្លួន ។

ទីភ្នាក់ងារព័ត៌មាន Yonhap របស់កូរ៉េខាងត្បូង បានរាយការណ៍ដោយលើកឡើងប្រភពពីកងទ័ពជើងទឹកកូរ៉េខាងត្បូងថា នាវាមុជទឹក USS Vermont របស់សហរដ្ឋអាមេរិក បានធ្វើដំណើរទៅដល់មូលដ្ឋានកងទ័ពជើងទឹកនៅទីក្រុង Busan កាលពីថ្ងៃចន្ទ ដើម្បផ្គត់ផ្គង់ឡើងវិញ និងអនុញ្ញាតឲ្យក្រុមនាវិកបានសម្រាក ។

សេចក្តីអត្ថាធិប្បាយចុះផ្សាយរបស់លោកស្រី Kim បានកើតមានឡើង ក្រោយរដ្ឋមន្រ្តីការបរទេសកូរ៉េខាងត្បូង សហរដ្ឋអាមេរិក និងជប៉ុន មាននូវជំនួបមួយកាលពីថ្ងៃចន្ទ នៅក្រៅមហាសន្និបាតអង្គការសហប្រជាជាតិ ដែលរៀបចំឡើងនៅបុរីញូយ៉ក សហរដ្ឋអាមេរិក ៕