កម្ពុជាបង្ហាញពីឱកាសនៃការវិនិយោគ ជូនដល់សភាពាណិជ្ជកម្មទីក្រុងសាន់ហ្វ្រាន់ស៊ីស្កូ នៃ​ក្រប​ខ័ណ្ឌ​គោលនយោបាយវិនិយោគ ថ្មីៗ, វិធីសាស្រ្តគាំទ្រអាជីវកម្ម, និងការត្រៀម​ខ្លួន​ដើម្បី​បម្រើ​វិនិយោគិន​ឱ្យបានទាន់ពេល និងបានបង្ហាញពីទីតាំងយុទ្ធសាស្ត្រសម្រាប់ ឱកាសវិនិយោគ។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅ​ថ្ងៃ​ទី​២៣ ខែកញ្ញា ឆ្នាំ២០២៤នេះ បានអញ្ជើញដឹកនាំ ជំនួបពិភាក្សាលើប្រធានបទ «បច្ចុប្បន្ន​ភាព​នៃ​បរិយាកាស​វិនិយោគនៅកម្ពុជា» ក្រោមការសម្របសម្រួលពីសភា ពាណិជ្ជកម្ម ទីក្រុងសាន់ហ្វ្រាន់​ស៊ីស្កូ ​ដោយមានការចូលរួមពីគណៈប្រតិភូ ធុរជនមកពីវិស័យពាក់ព័ន្ធ ដឹកនាំដោយលោក Crisostomo G. Ibarra ទីប្រឹក្សាផ្នែកច្បាប់ នៃការិយាល័យតំណាងសភាពាណិជ្ជកម្មកម្ពុជា ក្នុង​រដ្ឋ​កាលីហ្វរញ៉ា, ក្នុងនោះគណៈប្រតិភូកម្ពុជា ក៏បាន ទទួលការស្វាគមន៍យ៉ាងកក់ក្តៅ ពីសំណាក់សភាពាណិជ្ជកម្ម ទីក្រុងសាន់ហ្វ្រាន់ស៊ីស្កូ ដែលជាម្ចាស់ផ្ទះ និងបាន​ជជែក​ពិភាក្សា​ផ្លាស់ប្តូរយោបល់ ចែករំលែកបទពិសោធន៍លើបច្ចុប្បន្នភាព នៃការធ្វើពាណិជ្ជកម្មទាំងនៅកម្ពុជា និង​នៅក្នុងទីក្រុងសាន់ហ្វ្រាន់ស៊ីស្កូផ្ទាល់។

ជុំវិញ​ជំនួបនេះ, គណៈប្រតិភូកម្ពុជា មានគោលដៅចម្បង បង្ហាញពីឱកាសនៃ​ការ​វិនិយោគ​នៅ​កម្ពុជា ក៏ដូចជាក្របខ័ណ្ឌ គោលនយោបាយវិនិយោគថ្មីៗ វិធីសាស្រ្តគាំទ្រអាជីវកម្ម និងការ​ត្រៀម​ខ្លួន​ដើម្បី​បម្រើវិនិយោគិនឱ្យបានទាន់ពេលរបស់កម្ពុជា ដែលជា ប្រទេសមាន​ទីតាំង​យុទ្ធ​សាស្ត្រ​នៅ​ចំក​ណ្តាលអាស៊ាន។ ម៉្សាងទៀត, គោលដៅនៃជំនួបនេះ សំដៅសម្របសម្រួលទំនាក់ទំនង រវាង សហរដ្ឋអាមេរិក កាណាដា ជាមួយនិងក្រុមហ៊ុនក្នុងស្រុករបស់កម្ពុជា ដើម្បី​កំណត់​អត្ត​សញ្ញាណ​ដៃគូពាណិជ្ជកម្មដែលមាន សក្តានុពល។

ក្នុងកិច្ចពិភាក្សានេះ, ឯកឧត្តមឧបនាយករដ្ឋមន្ត្រី ស៊ុន ចាន់ថុល បានរំលេ​ច​អំពី​សក្តានុពល​នានារ​បស់​ព្រះរាជាណាចក្រកម្ពុជា ដោយសង្កត់ធ្ងន់លើសុខសន្តិភាព និងស្ថិរភាពនយោបាយ លំនឹង​ម៉ា​ក្រូ​សេដ្ឋកិច្ច កម្លាំងពលកម្មវ័យក្មេង ដែលមានលក្ខណៈសម្បត្តិ គ្រប់គ្រាន់ និងត្រៀម​រួច​រាល់​សម្រាប់​បរិវត្តកម្មឌីជីថល ហេដ្ឋារចនាសម្ព័ន្ធអន្តរមធ្យោបាយ ដែលបាននិង​កំពុង​អភិវឌ្ឍ​ឱ្យ​កាន់​តែមា​ន ភាពសម្បូរបែប និងប្រទាក់ក្រឡា។

ឯកឧត្តម ឧបនាយករដ្ឋមន្ត្រី ក៏បានលើកឡើងអំពីការគាំទ្រពីសំណាក់រាជរដ្ឋាភិបាល ដល់​ការ​រីក​លូតលា​ស់នៃ​វិស័យធុរកិច្ច ឯកជន ដោយមានក្រុមប្រឹក្សាអភិវឌ្ឍន៍កម្ពុជា ជាសេនាធិការ​ច្រក​ចេញ​ចូល​តែ​មួយ ក្នុងការសម្របសម្រួល ជាមួយនឹងបែបបទនៃការ វិនិយោគ ដែលមានភាពបត់បែន សំដៅ​លើកកម្ពស់បរិយាកាសធុរកិច្ចឱ្យកាន់តែមានជវភាព ភាពទាក់ទាញ ភាពអំណោយផលខ្ពស់ និងអនុគ្រោះបំផុតសម្រាប់វិនិយោគិនបរទេសផងដែរ។

សូមបញ្ជាក់ថា ជុំវិញការធ្វើពាណិជ្ជកម្មទ្វេភាគីកម្ពុជា-អាមេរិក បើតាមរបាយការណ៍គយ និង​រដ្ឋាករ​កម្ពុជា នៅក្នុងរយៈពេល ៨ ខែ ឆ្នាំ ២០២៤ នេះ ការធ្វើពាណិជ្ជកម្មប្រទេសទាំងពីរ មាន​ទំហំ​ទឹកប្រាក់សរុបជាង ៧ ៩២២ លានដុល្លារអាមេរិក បានកើនឡើងប្រមាណជាង ១០ ភាគរយ បើធៀប​រយៈពេលដូចគ្នាឆ្នាំ ២០២៣, ពោលគឺការធ្វើពាណិជ្ជកម្មទ្វេភាគីរវាងកម្ពុជា-អាមេរិក បាន​បន្ត​រក្សាកំណើនល្អប្រសើរ និងបាន កំពុងជួយជ្រោមជ្រែងដល់ការនាំចេញទំនញរបស់កម្ពុជា៕ អត្ថបទ៖ សុន រ៉ាឌី