អាហ្វហ្គានីស្ថាន៖ ប្រជាជននៅរដ្ឋធានីកាប៊ុលប្រទេសអាហ្វហ្គានីស្ថានសប្បាយរីករាយនៅសួនកម្សាន្តមួយកន្លែង រយៈពេលមួយខែបន្ទាប់ពីពួកតាលីបង់បានដណ្តើមអំណាច។ មន្ត្រីតាលីបង់ម្នាក់បាននិយាយថា រដ្ឋាភិបាលថ្មីនេះបានកាត់បន្ថយឧក្រិដ្ឋកម្មយ៉ាងច្រើន ហើយប្តេជ្ញាការពារប្រជាពលរដ្ឋឲ្យមានសុវត្ថិភាព។
នៅផ្នែកមួយនៃទីក្រុង ប្រជាជនបានប្រមូលផ្តុំគ្នានៅតាមដងផ្លូវនានា ខណៈមនុស្សរាប់សិបនាក់រង់ចាំយកនំប៉័ងដោយឥតគិតថ្លៃនៅពេលយប់ពីហាងនំមួយ។ លោក Sid Bilal Faqiri ជាអ្នកស្រុកដែលទើបតែបាត់បង់ការងារកាលពីពេលថ្មីៗនេះបាននិយាយថា សន្តិសុខបានប្រសើរឡើង បន្ទាប់ពីក្រុមតាលីបង់ដណ្ដើមកាន់កាប់ប្រទេសអាហ្វហ្គានីស្ថានទាំងស្រុង ប៉ុន្តែស្ថានភាពសេដ្ឋកិច្ចបានធ្លាក់ចុះដុនដាប។ លោកថា “ស្ថានភាពសេដ្ឋកិច្ចគឺយ៉ាប់យ៉ឺនខ្លាំង ព្រោះសហរដ្ឋអាមេរិកបានបង្កកលុយរបស់យើង”។
អាហ្វហ្គានីស្ថានដែលពឹងផ្អែកទាំងស្រុងលើជំនួយបរទេស ប្រឈមនឹងភាពក្រីក្រដែលបណ្តាលមកពីអស្ថិរភាពនយោបាយ ទុនបំរុងបរទេសត្រូវបានបង្កក និងប្រព័ន្ធហិរញ្ញវត្ថុសាធារណៈដួលរលំ។ នៅខែនេះ ក្រុមម្ចាស់ជំនួយរបស់អង្គការសហប្រជាជាតិបានសន្យាផ្តល់ជំនួយសង្គ្រោះបន្ទាន់ជាង ១,២ពាន់លានដុល្លារដើម្បីជួយសង្គ្រោះប្រទេសនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
