មន្ទីរពេទ្យនៅទូទាំងប្រទេសលីបង់ ជួបការលំបាកក្នុងការទប់ទល់នឹងចំនួនអ្នកស្លាប់ និងរបួសពីការវាយប្រហារតាមអាកាសដ៏សន្ធាប់របស់អ៊ីស្រាអែល កាលពីអង្គារ (២៤ កញ្ញា) ខណៈរដ្ឋមន្ត្រីសុខាភិបាលលីបង់ បាននិយាយថា អ្វីដែលបានកើតឡើងនៅក្នុងប្រទេសនេះគឺ "ការសម្លាប់រង្គាល"។

លោករដ្ឋមន្ត្រី ហ្វីរ៉ាស អាប៊ីយ៉ាដ (Firas Abiad) បាននិយាយថា “នោះជារឿងច្បាស់លាស់ណាស់” ព្រោះជនរងគ្រោះភាគច្រើនគឺជាជនស៊ីវិល រួមទាំងកុមារ និងស្ត្រី ដែលកំពុងតែនៅក្នុងលំនៅឋានរបស់ពួកគេធ្វើ “រឿងសកម្មភាពប្រចាំថ្ងៃធម្មតា”។ អ៊ីស្រាអែលនិយាយថា ខ្លួនកំពុងគោលដៅលើទីតាំងរបស់ក្រុមហេសបូឡា ដោយចោទក្រុមដែលគាំទ្រដោយអ៊ីរ៉ង់នេះថាលាក់អាវុធ និងគ្រាប់រ៉ូកែតក្នុងលំនៅដ្ឋានអ្នកស្រុក និងប្រើប្រាស់ជនស៊ីវិលជាខែលការពារខ្លួន។

អ៊ីស្រាអែល បានបន្តការវាយប្រហាររបស់ខ្លួនលើភាគខាងត្បូងលីបង់ កាលពីថ្ងៃអង្គារ ស្របពេលមានការអំពាវនាវឱ្យមានការអត់ធ្មត់ពីមេដឹកនាំពិភពលោកនៅឯមហាសន្និបាតអង្គការសហប្រជាជាតិ UNGA នៅទីក្រុងញូវយ៉ក។ ក្រសួងសុខាភិបាលលីបង់រាយការណ៍ថា ចំនួនអ្នកស្លាប់សរុបកើនឡើងជាង ៥០០នាក់ រួមទាំងកុមាររាប់សិបនាក់ ចាប់តាំងពីការវាយប្រហាររបស់អ៊ីស្រាអែល បានចាប់ផ្តើមកាលពីថ្ងៃចន្ទមក។

ជនភៀសខ្លួនរាប់ម៉ឺននាក់កំពុងរត់ចេញចេញពីផ្ទះសម្បែងរបស់ពួកគេនៅទូទាំងលីបង់ ដោយមនុស្សជាច្រើនបានជ្រកកោននៅក្នុងសាលារៀនរដ្ឋ និងមជ្ឈមណ្ឌលជម្រកបណ្ដោះអាសន្ន។ ការិយាល័យសិទ្ធិមនុស្សរបស់អង្គការសហប្រជាជាតិ បានសម្តែងការព្រួយបារម្មណ៍ចំពោះចំនួនអ្នកស្លាប់ និងរបួសដ៏លើសលប់ក្នុងការវាយប្រហារនោះ ដោយនិយាយថា សកម្មភាពយោធាទាំងនោះអាចបំពានច្បាប់មនុស្សធម៌អន្តរជាតិ៕