​បាល់ទាត់៖ ​អតីត​ខ្សែបម្រើក្រុម​កាំភ្លើង​ធំ Arsenal និង Manchester City, Samir Nasri បានប្រកាស​ចូលនិវត្តន៍​ពី​អាជីព​កីឡាករ​បាល់ទាត់​ហើយ​ក្នុង​វ័យ ៣៤ឆ្នាំ​។ ​Samir Nasri បានធ្វើឱ្យ​ខ្លួន​មានឈ្មោះ​ល្បី​នៅពេល​ប្រកប​អាជីព​នៅ​ទឹកដី​បារាំង Olympique Marseille ដែល​ធ្វើឱ្យមាន​ការចាប់អារម្មណ៍​ពី​លោក Arsene Wenger និង​ផ្លាស់​ទៅកាន់​ក្រុម​កាំភ្លើង​ធំ Arsenal នៅ​ឆ្នាំ២០០៨ ក្នុងតម្លៃ ១២លាន​ផោន​។

​​ក្រោយ ៣ឆ្នាំ​នៅ​ទឹកដី Emirate, Samir Nasri ក៏​ផ្លាស់​ទៅកាន់ Manchester City នៅ​ឆ្នាំ២០១១ ក្នុងតម្លៃ ២៥លាន​ផោន និង​ជួយ​ក្រុម​ឈ្នះ​ជើងឯក English Premier League ២លើក និង FA Cup មួយ​លើក​ក្នុង​រយៈពេល ៦ឆ្នាំ​នៅ Etihad នោះ​។ ​បន្ទាប់ពី​ចាកចេញ​ពី Manchester City, Nasri បាន​បន្តដំណើរ​អាជីព​របស់ខ្លួន​ជាមួយ​ក្លិប​ទួ​ក​គី Antalyaspor, West Ham និង Anderlecht ក្នុង​រយៈពេល ៤ឆ្នាំ​បន្ទាប់ពី​ចាក​ចេញពី Manchester City​។​ ​សរុប​តាំងពី​ប្រកប​អាជីព​ដំបូង​ជាមួយ Marseille រហូតដល់​ក្លិប​ចុងក្រោយ Anderlecht, Samir Nasri បង្ហាញខ្លួន​សរុប ៣៧៩ប្រកួត​រកបាន ៥២គ្រាប់​។ ​Samir Nasri ធ្លាប់​បង្ហាញខ្លួន​ឱ្យ​ក្រុម​ជំរើសជាតិ​បារាំង​តាំងពី U16 ដល់​ក្រុម​ធំ ដោយ​ក្នុងនោះ​ជាមួយ​ក្រុម​ធំ​បង្ហាញខ្លួន​បាន ៤១លើក​រកបាន ៥គ្រាប់​៕

​អត្ថបទ​៖​នាង សុភា​វុ​ធ