អគ្គលេខាធិការអង្គការសហប្រជាជាតិ (UN) លោក Antonio Guterres កាលពីថ្ងៃអង្គារ (ទី២៤ ខែកញ្ញា) បានថ្កោលទោសដល់ការកើនឡើងជាលំដាប់នៃរដ្ឋាភិបាល និងក្រុមផ្សេងទៀត ដែលជឿជាក់ថា ពួកគេ «ទទួលបានសិទ្ធិរួចពីការជាប់ទោសទណ្ឌ» ពោលគឺមិនចាំបាច់ទទួលខុសត្រូវអ្វីទាំងអស់ ដោយលោកលើកឡើងពីសង្គ្រាម នៅអ៊ុយក្រែន តំបន់ហ្កាហ្សាស្ទ្រីប និងស៊ូដង់។

នៅឯមហាសន្និបាតអង្គការសហប្រជាជាតិ លោក Guterres បានប្រាប់បណ្ដាមេដឹកនាំពិភពលោកថា៖ «ពួកគេអាចជាន់ឈ្លីច្បាប់អន្តរជាតិ។ ពួកគេអាចបំពានធម្មនុញ្ញអង្គការសហប្រជាជាតិ។ ពួកគេអាចលុកលុយប្រទេសមួយផ្សេងទៀត បំផ្លាញសង្គមទាំងមូល ឬមិនយកចិត្តទុកដាក់ទាល់តែសោះ ចំពោះសុខុមាលភាពរបស់ប្រជាជនខ្លួន។ ហើយគ្មានអ្វីនឹងកើតឡើងចំពោះពួកគេទេ»។ លោកបានសង្កត់ធ្ងន់ថា៖ «កម្រិតនៃនិទណ្ឌភាព ក្នុងពិភពលោក គឺជានយោបាយរឿងមិនអាចការពារបានខាងនយោបាយ និងមិនអាចអត់ឱនឲ្យបានខាងសីលធម៌»។

ការវាយលុករបស់អ៊ីស្រាអែលរយៈពេលជិត ១ឆ្នាំ នៅតំបន់ហ្កាហ្សាដែលត្រូវបានឡោមព័ទ្ធ ឥឡូវនេះ គំរាមកំហែងរាលដាលដល់ប្រទេសលីបង់ ជាកន្លែងដែលអ៊ីស្រាអែលបានវាយប្រហារលើក្រុមហេសបូឡាជាង ១.០០០គោលដៅ កាលពីថ្ងៃចន្ទ (ទី២៣ ខែកញ្ញា) ហើយលោក Guterres បានអង្វរករដោយអន្ទះសារសុំឲ្យបន្ថូរបន្ថយភាពតានតឹង។

ចំណែករុស្ស៊ីបានលុកលុយប្រទេសជិតខាងអ៊ុយក្រែន ក្នុងខែកុម្ភៈ ឆ្នាំ២០២២ ហើយជម្លោះបានកើនឡើងខ្លាំងទៅៗ នាពេលថ្មីៗនេះ។ ហើយលោក Guterres បាននិយាយថា៖ «ជនស៊ីវិលកំពុងជួបនឹងផលវិបាក ដោយចំនួនអ្នកស្លាប់កើនឡើង ហើយជីវិត និងសហគមន៍រងការបំផ្លិចបំផ្លាញយ៉ាងធ្ងន់ធ្ងរ» ដោយលោកបន្ថែមថា វាដល់ពេលហើយ ក្នុងការមានសន្តិភាពដែលផ្អែកលើធម្មនុញ្ញអង្គការសហប្រជាជាតិ ច្បាប់អន្តរជាតិ និងដំណោះស្រាយរបស់អង្គការសហប្រជាជាតិ។

ចំណែកនៅប្រទេសស៊ូដង់វិញ លោក Guterres បានថ្កោលទោស ចំពោះ «ការតស៊ូដណ្ដើមអំណាចដ៏ឃោរឃៅ» រវាងកងទ័ពស៊ូដង់ និងកងកម្លាំងគាំទ្ររហ័សប៉ារ៉ាយោធា ដែលបានផ្ទុះក្លាយជាសង្រ្គាម កាលពីពាក់កណ្តាលខែមេសាឆ្នាំមុន៕