អ្នកនាំពាក្យក្រុមប្រឹក្សាសន្តិសុខជាតិអាមេរិក លោក John Kirby បាននិយាយថា ប្រធានាធិបតីអាមេរិក លោក ចូ បៃដិន Joe Biden គ្រោងនឹងពិភាក្សាអំពីលទ្ធភាពនៃការវាយប្រហារដោយអាវុធរបស់អាមេរិក ចូលទៅជ្រៅ នៅក្នុងប្រទេសរុស្ស៊ី នៅពេលជួបជាមួយសមភាគីអ៊ុយក្រែនលោក វ្ល៉ូឌីមី ហ្សេឡិនស្គី (Vladimir Zelensky) នៅសេតវិមាន នៅថ្ងៃទី ២៦ ខែកញ្ញានេះ។ 

លោកបានថ្លែងក្នុងសន្និសីទសារព័ត៌មានមួយសម្រាប់អ្នកសារព័ត៌មានអន្តរជាតិថា៖« លោកប្រធានាធិបតី បានប្រកាន់ខ្ជាប់ថា គោលនយោបាយរបស់យើង គឺថា សមត្ថភាពវាយប្រហារចម្ងាយឆ្ងាយ ដែលផ្តល់ដោយសហរដ្ឋអាមេរិក គឺមិនត្រូវប្រើប្រឆាំងនឹងគោលដៅ នៅក្នុងប្រទេសរុស្ស៊ីទេ។ គាត់មិនបានធ្វើការផ្លាស់ប្តូរគោលនយោបាយនោះទេ។ គាត់នៅតែរក្សាជំហរនេះដដែល។ នោះហើយជាការណែនាំដែលថា យើងបានផ្តល់ឲ្យអ៊ុយក្រែន។ យើងយល់ថា ពួកគេបានស្នើសុំឲ្យមានការផ្លាស់ប្តូរ»។ «ខ្ញុំប្រាកដថា បញ្ហានេះ នឹងកើតឡើង។ ប៉ុន្តែគាត់មិនបានផ្លាស់ប្តូរទស្សនៈរបស់គាត់ដែលថា ការប្រើប្រាស់អាវុធរបស់សហរដ្ឋអាមេរិក អាវុធរយៈចម្ងាយឆ្ងាយប្រឆាំងនឹងគោលដៅនៅក្នុងប្រទេសរុស្ស៊ី ត្រូវបានហាមឃាត់»។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រាប់អ្នកយកព័ត៌មាន កាលពីថ្ងៃទី១២ ខែកញ្ញាថា អ៊ុយក្រែនមិនអាចធ្វើការវាយប្រហារ នៅក្នុងទឹកដីរុស្ស៊ីដោយគ្មានជំនួយពីលោកខាងលិចបានទេ ព្រោះវាត្រូវការព័ត៌មានសម្ងាត់ពីផ្កាយរណប និងទិន្នន័យហោះហើរ ដើម្បីធ្វើដូច្នេះ។ យោងតាមលោកប្រធានាធិបតី ការជជែកដេញដោលគ្នានាពេលបច្ចុប្បន្នក្នុងចំណោមបណ្តាប្រទេសណាតូ មិនមែនគ្រាន់តែអំពីសក្តានុពលរបស់ទីក្រុងគីវនៃការប្រើប្រាស់អាវុធរយៈចម្ងាយឆ្ងាយរបស់លោកខាងលិចប៉ុណ្ណោះទេ ប៉ុន្តែពួកគេក៏កំពុងធ្វើការសម្រេចចិត្តជាសំខាន់ថាតើត្រូវចូលរួមដោយផ្ទាល់នៅក្នុងជម្លោះអ៊ុយក្រែនដែរឬទេ។ លោក ពូទីន បាននិយាយថា ទីក្រុងមូស្គូ នឹងឆ្លើយតបទៅនឹងការគំរាមកំហែង ដែលនឹងត្រូវបានធ្វើឡើងចំពោះប្រទេសរុស្ស៊ី។