អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) បាននិយាយនៅឯមហាសន្និបាតអង្គការសហប្រជាជាតិ(UNGA )ថា ការដាក់ទីតាំងអាវុធនុយក្លេអ៊ែរ សង្គ្រាម និងការបែងចែកភូមិសាស្ត្រនយោបាយ កំពុងធ្វើឲ្យពិភពលោកក្លាយជាកន្លែងគ្រោះថ្នាក់កាន់តែខ្លាំងឡើង។

លោកអគ្គលេខាធិការ បានថ្លែងក្នុងកិច្ចពិភាក្សាទូទៅនៃសម័យប្រជុំលើកទី៧៩របស់មហាសន្និបាតUNថា៖«ការបែងចែកភូមិសាស្ត្រនយោបាយ បន្តកាន់តែស៊ីជម្រៅឡើង។ ភពផែនដី កំពុងបន្តឡើងកម្តៅ។ សង្រ្គាម ផ្ទុះឡើងដោយគ្មានតម្រុយថាតើពួកគេ នឹងបញ្ចប់ដោយរបៀបណានោះទេ ហើយការដាក់ទីតាំង នុយក្លេអ៊ែរ និងអាវុធថ្មីៗ បានធ្វើឲ្យមានស្រមោលខ្មៅងងឹតកើតឡើង។ យើងកំពុងឆ្ពោះទៅរកអ្វីដែលនឹកស្មានមិនដល់  គឺស្ថានភាពដ៏គ្រោះថ្នាក់បំផុត កំពុងរួបរឹតពិភពលោកទាំងមូល។ 

លោក ហ្គុយតឺរេស បាននិយាយថា មនុស្សជាតិ កំពុងឆ្លងកាត់ការផ្លាស់ប្តូរយ៉ាងខ្លាំង ដោយជួបប្រទះនឹងបញ្ហាប្រឈមជាច្រើនដែលមិនធ្លាប់មានពីមុនមក ដែលទាមទារឲ្យមានដំណោះស្រាយជាសកល។