ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្រេចផ្តល់ជំនួយវ៉ាក់សាំងប្រភេទស៊ីណូវ៉ាក់ចំនួន ២០ម៉ឺនដូស ជូនរដ្ឋាភិបាល និងប្រជាជនឡាវ ដើម្បីរួមគ្នាទប់ស្កាត់កូវីដ-១៩ និងគិតគូរលើសុខុមាលភាពប្រជាពលរដ្ឋ។ នេះបើយោងតាមប្រសាសន៍របស់លោកជំទាវ ឱ វណ្ណឌីន ប្រធានគណកម្មការចំពោះកិច្ចចាក់វ៉ាក់សាំងកូវីដ-១៩ ថ្លែងប្រាប់BTV នៅយប់ថ្ងៃទី២៧ ខែកញ្ញា ឆ្នាំ២០២១នេះ។

លោកជំទាវ ឱ វណ្ណឌីន បញ្ជាក់ថា ការនាំយកអំណោយប្រគល់ជូនដល់ប្រទេសឡាវជាវ៉ាក់សាំងនេះ គឺជាការគិតគូររបស់សម្ដេចតេជោ ហ៊ុន សែន នាយករដ្ឋមន្ត្រីទៅលើសុខភាពសុខមាលភាពរបស់ប្រជាពលរដ្ឋ ដោយមិនមែនត្រឹមតែសុខមាលភាពរបស់ប្រជាពលរដ្ឋកម្ពុជាទេ ក្នុងនោះ សម្តេចតេជោ ក៏គិតគូរដល់កិច្ចសហប្រតិបត្តិការរួមគ្នា គិតគូរដល់ការជួយរួមគ្នាទប់ស្កាត់ការឆ្លងកូវីដ-១៩ ហើយការផ្ដល់ជូនវ៉ាក់សាំងទៅប្រទេសឡាវនេះ ជាការសម្រេចចិត្តរបស់សម្ដេចតេជោជួយគ្នាទៅវិញទៅមក ហើយក៏ជាបេះដូងមនុស្សធម៌របស់សម្ដេចតេជោ ក្នុងការពង្រឹងកិច្ចសហប្រតិបត្តិការរវាងកម្ពុជា និងឡាវផងដែរ។

វ៉ាក់សាំងស៉ីណូវ៉ាក់ចំនួន ២០ម៉ឺនដូសនេះ ឯកឧត្តម អ៊ុច បូររិទ្ធ រដ្ឋលេខាធិការ ក្រសួងការបរទេស និង សហប្រតិបត្តិការអន្តរជាតិកម្ពុជា តំណាងរបស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា នឹងយកទៅប្រគល់ជូនរដ្ឋាភិបាលឡាវ និងប្រជាជនឡាវ នៅថ្ងៃស្អែកទី២៨ ខែកញ្ញា ឆ្នាំ២០២១នេះ នៅច្រកព្រំដែនអន្តរជាតិត្រពាំងក្រៀល ក្នុងខេត្តស្ទឹងត្រែង ជាប់ព្រំដែនខេត្តចម្ប៉ាស័ករបស់ឡាវ៕ អត្ថបទ៖ ពៅ រក្សា