កូរ៉េខាងជើងកាលពីថ្ងៃពុធ បានថ្កោលទោសសហរដ្ឋអាមេរិកចំពោះការរំលោភលើសិទ្ធិអធិបតេយ្យភាពរបស់កូរ៉េខាងជើង និងព្យាយាមបង្ហាញអំពីភាពត្រឹមត្រូវនៃគោលនយោបាយអរិភាពរបស់ខ្លួនប្រឆាំងនឹងទីក្រុងព្យុងយ៉ាង តាមរយៈការរៀបចំកិច្ចប្រជុំកំពូល Quad ជាមួយមេដឹកនាំនៃប្រទេសឥណ្ឌា ជប៉ុន និង អូស្ត្រាលី។

បន្ទាប់ពីរៀបចំកិច្ចប្រជុំកំពូលលើកទី៤ នៅទីក្រុង Wilmington រដ្ឋ Delaware មេដឹកនាំនៃប្រទេសទាំង៤ ក្នុងភាពជាដៃគូសន្តិសុខ Quad កាលពីថ្ងៃសៅរ៍ បានចេញសេចក្តីថ្លែងការណ៍រួមមួយ ដោយថ្កោលទោសការបាញ់មីស៊ីលរបស់កូរ៉េខាងជើង និងកម្មវិធីនុយក្លេអ៊ែររបស់ខ្លួន ហើយបញ្ជាក់ឡើងវិញនូវការប្តេជ្ញាចិត្តរបស់ពួកគេចំពោះការលុបបំបាត់អាវុធនុយក្លេអ៊ែរ«ទាំងស្រុង»ពីឧបទ្វីបកូរ៉េ។

កិច្ចប្រជុំកំពូល Quad បានកើតឡើង ចំពេលមានការព្រួយបារម្ភកាន់តែខ្លាំងឡើងអំពីការរាមកំហែងនុយក្លេអ៊ែរនិងមីស៊ីលបាលីស្ទីកកាន់តែកើនឡើងរបស់កូរ៉េខាងជើង និងការពង្រឹងកិច្ចសហប្រតិបត្តិការយោធារវាងទីក្រុងព្យុងយ៉ាង និងទីក្រុងមូស្គូ។

យោងតាមទីភ្នាក់ងារសារព័ត៌មានមជ្ឈិមកូរ៉េ (KCNA) អ្នកនាំពាក្យរបស់ក្រសួងការបរទេសកូរ៉េខាងជើងបាននិយាយថា Quad មិនមែនជាឧបករណ៍នយោបាយ និងការទូត ដើម្បីអនុវត្តយុទ្ធសាស្ត្ររបស់សហរដ្ឋអាមេរិកសម្រាប់ការគ្រប់គ្រងដោយឯកតោភាគីនោះទេ។