ទីក្រុង Deir Ammar ស្ថិតនៅភាគខាងជើងប្រទេសលីបង់ បានស្វាគមន៍មនុស្សជម្លៀសខ្លួនពីតំបន់ភាគខាងត្បូង ។

 ក្រោយសង្រ្គាមរយៈពេលជិត ១២ខែជាមួយក្រុមជីវពលហាម៉ាស់ប៉ាឡេស្ទីន នៅតំបន់ហ្កាហ្សា នៅតំបន់ព្រំដែនភាគខាងត្បូង បច្ចុប្បន្នអ៊ីស្រាអែល បានផ្លាស់ប្តូរយុទ្ធសាស្រ្តសង្រ្គាមរបស់ពួកគេមកលើតំបន់ព្រំដែនភាគខាងជើងវិញ ជាទីដែលក្រុមហេសប៊ូឡា បានផ្លោងគ្រាប់រ៉ុក្កែតចូលទឹកដីរបស់ពួកគេ ដើម្បគាំទ្រក្រុមហាម៉ាស់ ដែលគាំទ្រផងដែរដោយអ៊ីរ៉ង់ ។ 

 លោក Hussein Muhammad Darwish គឺជាពលរដ្ឋមួយរូបមកពីទីក្រុង Bint Jbeil ស្ថិតនៅភាគខាងត្បូងលីបង់ និយាយថា ធ្វើដំណើរមកកាន់ទីក្រុង Deir Ammar ប្រៀបបាននឹងការចាកចេញពីផ្ទះមួយ ទៅជ្រកកោននៅផ្ទះមួយទៀត ។

 ពលរដ្ឋជម្លៀសខ្លួន ត្រូវបានគេមើលឃើញផងដែរនៅសណ្ឋាគារ Quality Inn ស្ថិតក្នុងទីក្រុង Tripoli ។

 គួរឲ្យដឹងថា ក្រុមហេសប៊ូឡា និងអ៊ីស្រាអែល បានធ្វើសង្រ្គាមឆ្លងព្រំដែន ចាប់តាំងពីការចាប់ផ្តើមសង្រ្គាមអ៊ីស្រាអែលលើតំបន់ហ្កាហ្សា ដែលបានសម្លាប់មនុស្សជាង ៤១.៤០០នាក់ ដែលភាគច្រើននៃពួកគេ គឺជាស្រ្តី និងកុមារ បន្ទាប់ពីការវាយប្រហាររបស់ក្រុមហាម៉ាស់លើតំបន់ភាគខាងត្បូងអ៊ីស្រាអែល កាលពីថ្ងៃទី ៧ ខែតុលា ឆ្នាម ២០២៣ ។

 ការអំពាវនាវឲ្យមានដំណោះស្រាយការទូត បានកើនឡើង ស្របពេលដែលជម្លោះកាន់តែធ្ងន់ធ្ងរទៅ ក្នុងនោះប្រធានសិទ្ធិមនុស្សអង្គការសហប្រជាជាតិ(UN)លោក Volker Turk បានជំរុញឲ្យរដ្ឋទាំងអស់ និងរដ្ឋដែលមានឥទ្ធិពល ត្រូវទប់ស្កាត់ភាពតានតឹងឡើងកម្តៅបន្ថែមទៀតនៅប្រទេសលីបង់ ៕