ក្រុមសកម្មប្រយុទ្ធ Shia បាននិយាយនៅលើបណ្តាញ Telegram របស់ខ្លួនថា អង្គភាពហេសបូឡា បានអះអាងទទួលខុសត្រូវចំពោះការវាយប្រហារដោយមីស៊ីលលើតំបន់ជាយក្រុងតែលអាវីវ( Tel Aviv) ។

ក្រុមហេសបូឡា បានអះអាងថា៖«ក្រុមយុទ្ធជនប្រយុទ្ធតស៊ូ បានប្រើមីស៊ីលបាលីស្ទីក Qader-1 ដើម្បីវាយប្រហារទីស្នាក់ការកណ្តាលនៃសេវាស៊ើបការណ៍សម្ងាត់ Mossad ដែលទទួលខុសត្រូវចំពោះការផ្ទុះឧបករណ៍ទំនាក់ទំនងឥតខ្សែ នៅក្នុងប្រទេសលីបង់ កាលពីថ្ងៃទី ១៧ និង ១៨ ខែកញ្ញា»។

ការផ្ទុះឧបករណ៍ទំនាក់ទំនងឥតខ្សែជាបន្តបន្ទាប់ បានធ្វើឲ្យកក្រើកសាធារណរដ្ឋអារ៉ាប់ កាលពីថ្ងៃទី ១៧ និង ១៨ ខែកញ្ញា។ ក្រសួងសុខាភិបាលលីបង់ បាននិយាយថា មនុស្ស ៧០នាក់ ត្រូវបានសម្លាប់ នៅក្នុងការវាយប្រហារពីរដ៏សាហាវនេះ ដោយមានមនុស្សប្រហែល ៣.000 នាក់ផ្សេងទៀត បានរងរបួស។ ក្រុមហេសបូឡា បានចោទប្រកាន់អ៊ីស្រាអែលថា បានរៀបចំផែនការវាយប្រហារតាមអ៊ីនធឺណិត។

កាលពីថ្ងៃទី ២០ ខែកញ្ញា មេដឹកនាំយោធាជាន់ខ្ពស់ហេសបូឡាចំនួនពីរនាក់ និងមេបញ្ជាការប្រចាំចំនួន  ១៤នាក់ ត្រូវបានសម្លាប់ នៅក្នុងការវាយប្រហារតាមអាកាសរបស់អ៊ីស្រាអែល ទៅលើទីស្នាក់ការកណ្តាល ហេសបូឡា នៅជាយក្រុងភាគខាងត្បូងនៃទីក្រុងបេរូត។