ប្រមុខយោធាអ៊ីស្រាអែលបានប្រាប់កងទ័ពកាលពីថ្ងៃពុធ ទី២៥ កញ្ញា ថា ការវាយប្រហារតាមអាកាសដ៏ខ្លាំងក្លារបស់ខ្លួនលើប្រទេសលីបង់កំពុងត្រៀមសម្រាប់មធ្យោបាយប្រតិបត្តិការជើងគោកដែលអាចធ្វើទៅបានដោយកងកម្លាំងអ៊ីស្រាអែលប្រឆាំងក្រុមសកម្មប្រយុទ្ធ ហេសបូឡា ខណៈផ្នែកការទូតព្យាយាមឥតសម្រាកដើម្បីបញ្ចៀសសង្គ្រាមពេញបន្ទុក។

លោកឧត្តមសេនីយ Herzi Halevi បាននិយាយថា អ្នកឮសំឡេងយន្តហោះនៅពីលើអ្នក យើងបានបើកការវាយប្រហារពេញមួយថ្ងៃ។នេះគឺដើម្បីត្រៀមសម្រាប់ការវាយលុកថ្មើរជើងដែលអាចកើតឡើងនិងដើម្បីបន្តបំបាក់ក្រុមហេសបូឡា។

ប្រធានាធិបតីប្រទេសកោះស៊ីបលោក នីកូស គ្រីស្តូដូលីឌីស (Nikos Christodoulides) បានប្រាប់សារព័ត៌មាន Reuters នៅខាងក្រៅកិច្ចពិភាក្សារបស់មហាសន្និបាតអង្គការសហប្រជាជាតិ ក្នុងទីក្រុង New York ថា សហរដ្ឋអាមេរិក និងបារាំង កំពុងព្យាយាមសម្រេចបានកិច្ចព្រមព្រៀងបណ្តោះអាសន្នមួយ ដើម្បីបញ្ឈប់អរិភាពក្នុងគោលបំណងបើកកិច្ចចរចាឱ្យកាន់តែទូលំទូលាយ ដោយនឹងរួមបញ្ចូលកិច្ចខិតខំប្រឹងប្រែងដើម្បីសម្រេចបានបទឈប់បាញ់ដែលបានស្វែងរកជាយូរមកហើយនៅក្នុងតំបន់ហ្កាហ្សា។

ប្រធានាធិបតីអាមេរិកលោក Joe Biden បានប្រាប់ទូរទស្សន៍ ABC ថា សង្គ្រាមពេញបន្ទុកអាចផ្ទុះឡើងបាន ប៉ុន្តែបានបន្ថែមថា យើងនៅតែស្ថិតក្នុងតួនាទីដើម្បីឱ្យមានដំណោះស្រាយដែលអាចផ្លាស់ប្តូរជាមូលដ្ឋានទាំងស្រុងក្នុងតំបន់មជ្ឈិមបូព៌ា។

អ៊ីស្រាអែលបានវាយសន្ធាប់ការវាយប្រហារតាមអាកាសរបស់ខ្លួននៅក្នុងប្រទេសលីបង់កាលពីថ្ងៃពុធ សប្ដាហ៍នេះ ហើយរដ្ឋមន្ត្រីសុខាភិបាលរបស់ប្រទេសលីបង់បានរាយការណ៍ថាមនុស្សយ៉ាងហោចណាស់៥១នាក់ត្រូវបានសម្លាប់ និងយ៉ាងហោចណាស់ ២២៣ នាក់បានរងរបួសនៅក្នុងការវាយប្រហារកាលពីថ្ងៃពុធនោះ។អ៊ីស្រាអែលបានបាញ់ទម្លាក់មីស៊ីលដែលក្រុមចលនាហេសបូឡាគាំទ្រដោយអ៊ីរ៉ង់បាននិយាយថាខ្លួនបានតម្រង់គោលដៅទៅលើទីស្នាក់ការរបស់ទីភ្នាក់ងារចារកម្ម Mossad ក្បែរទីក្រុង Tel Aviv របស់អ៊ីស្រាអែល៕