យោងតាមក្រសួងសុខាភិបាលក្នុងប្រទេសស៊ូដង់ បានឲ្យដឹងថា ការផ្ទុះឡើងនៃជំងឺអាសន្នរោគនៅក្នុងប្រទេសហែកហួរដោយសង្រ្គាមស៊ីវិលមួយនេះ បានឆក់យកជីវិតមនុស្សចំនួន៤៣៣នាក់។

សេចក្តីថ្លែងការណ៍របស់ក្រសួងសុខាភិបាលនៃប្រទេសនេះ បាននិយាយថាចំនួនករណីឆ្លងសរុបបានកើនឡើងដល់ ១៣.៩២២នាក់ ជាទីដែលមានភ្លៀងធ្លាក់ខ្លាំង និងទឹកជំនន់ ចាប់តាំងពីខែមិថុនាបានបង្កឱ្យមានការផ្ទុះរាលដាលនៃជំងឺនេះ។

ដោយបានប្រកាសពីការឆ្លងរាតត្បាតកាលពីថ្ងៃទី១២សីហាឆ្នាំ២០២៤នេះ ការផ្ទុះឡើងកាន់តែខ្លាំង ស្របពេលមានសង្រ្គាមស៊ីវិល និងទឹកជំនន់កំពុងបន្ត ដែលធ្វើឲ្យប្រព័ន្ធថែទាំសុខភាពរបស់ប្រទេសនេះរងការប៉ះពាល់យ៉ាងធ្ងន់ធ្ងរ។

ដោយសារប្រទេសនេះក៏ស្ថិតនៅចំកណ្តាលនៃសង្គ្រាមស៊ីវិលដ៏បំផ្លិចបំផ្លាញ ការរីករាលដាលនៃជំងឺរាតត្បាត បានធ្វើឱ្យជីវិតប្រជាពលរដ្ឋស៊ូដង់កាន់តែលំបាក ខណៈប្រព័ន្ធសុខាភិបាលរបស់ខ្លួនមិនអាចដំណើរការប្រកបដោយប្រសិទ្ធភាព។

គួររម្លឹកថា ប្រទេសស៊ូដង់បានរងគ្រោះយ៉ាងធ្ងន់ធ្ងរពីគ្រោះទឹកជំនន់ ដោយសារភ្លៀងធ្លាក់ខ្លាំង បណ្ដាលឲ្យបាក់ទំនប់ទឹក សម្លាប់មនុស្សចំនួន១៧៣នាក់ និងជាង៥០០នាក់ រងរបួសក្នុងអំឡុងខែកញ្ញាឆ្នាំ២០២៤នេះ៕