សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានចាត់ទុកការផ្តន្ទាទោសឲ្យបុរស ដែលបានបើកឡានក្នុងស្ថានភាពស្រវឹងជោគជាំ ហើយបានបុកឲ្យគេស្លាប់៤នាក់ និងរងរបួសធ្ងន់ស្រាលមួយចំនួនទៀត នៅក្រោមស្ពានខណ្ឌឫស្សីកែវ ហាក់បីដូចជាមិនយុត្តិធម៌ នោះឡើយ ហើយសម្តេច បានបញ្ជាឲ្យក្រសួងយុត្តិធម៌ធ្វើការសើរើចំពោះករណីនេះ ឡើងវិញ ជាបន្ទាន់ផងដែរ។

ក្នុងឱកាសអញ្ជើញប្រគល់សញ្ញាបត្រ ដល់និស្សិតជ័យលាភី នៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ចប្រមាណ៣.៥៣០នាក់ នាថ្ងៃទី២៦ ខែកញ្ញា ឆ្នាំ២០២៤នេះ សម្តេចធិបតី នាយករដ្ឋមន្រ្តី បានបញ្ជាឱ្យក្រសួងយុត្តិធម៌ ប្រើសិទ្ធិអធិបញ្ជាក្នុងការប្ដឹងទៅសាលាឧទ្ធរណ៍ ជុំវិញករណីគ្រោះថ្នាក់ចរាចរណ៍មួយដែលបានបង្កឱ្យមនុស្សស្លាប់ចំនួន៤នាក់ ខណៈសាលាដំបូង​រាជធានីភ្នំពេញ បានសម្រេច​ផ្ដន្ទាទោស​ឲ្យជនបង្ករនេះ ​ជាប់ពន្ធ​ធនាគារ​ត្រឹមតែ៥ឆ្នាំ ហើយបានធ្វើ​ឲ្យសាធារណជនមានការរិះគន់ ​និងមិនយល់ព្រម។

សម្តេចធិបតីនាយករដ្ឋមន្រ្តី ​លើកឡើងថា ​បញ្ហាបុរសម្នាក់ដែលស្រវឹង​ជោគជាំ ហើយបានបើកឡាន​បុកមនុស្សស្លាប់រហូតដល់ទៅបួននាក់ ​នៅក្រោមស្ពាន ខណ្ឌឫស្សីកែវ នាពេលកន្លងទៅនេះ តែត្រូវបាន​តុលាការក្រុងភ្នំពេញ សម្រេចកាត់ក្តីឲ្យជាប់ពន្ធនាគារត្រឹមតែ៥ឆ្នាំនោះ​ហាក់បីដូចជា​មិនសមរម្យ និងយុត្តិធម៌នោះឡើយសម្រាប់ជនរងគ្រោះ ហើយប្រសិនបើច្បាប់កំណត់ត្រឹម​ប៉ុណ្ណឹងមែននោះ ក្រសួងយុត្តិធម៌ត្រូវតែធ្វើវិសោធនកម្មច្បាប់ភ្លាមៗ ចំពោះករណីនេះ។

សូមបញ្ជាក់ថា សាលាដំបូងរាជធានីភ្នំពេញ ​បានសម្រេចផ្ដន្ទាទោស​បុរសស្រវឹងបើករថយន្ត​បុក​មនុស្ស​ស្លាប់៤នាក់ នៅស្ពានអាកាសឬស្សីកែវ ឱ្យជាប់ពន្ធធនាគា៥ឆ្នាំ ​និងពិន័យជាប្រាក់ចំនួន ២០ លានរៀល។ ក្រោយតុលាការធ្វើការផ្តន្ទាទោសចំពោះជនជាប់ចោទនេះត្រឹមតែ៥ឆ្នាំ និង​ពិន័យ​ជា​ប្រាក់ត្រឹមតែ២០លានរៀលនោះ ត្រូវបានមហាជនធ្វើការរិះគន់​យ៉ាងខ្លាំង ​និង​មិនយល់ព្រម​លើការ​សម្រេច​របស់តុលាការនោះឡើយ ​បើ​ទោះបីជា​សាច់ញាតិ​របស់​ជនរងគ្រោះ​ធ្វើការ​ដក​ពាក្យ​បណ្តឹង​ក៏​ដោយនោះ។

គួរម្លឹកថា កាលពីវេលាម៉ោង១៨៖៤០នាទីយប់ ថ្ងៃទី២០ ខែមករា ឆ្នាំ២០២៤ កន្លងទៅ មាន​មនុស្ស​ប្រុសស្រី៤នាក់ បានបាត់បង់ជីវិតភ្លាមៗ​ នៅនឹងកន្លែង​កើតហេតុ ​និងបួននាក់ផ្សេងទៀត​រងរបួសធ្ងន់​ស្រាល ត្រូវបានរថយន្ដសង្គ្រោះ ដឹកយកទៅសង្គ្រោះភា្លមៗ​នៅឯមន្ទីពេទ្យ ក្នុង​ករណីបុរសម្នាក់​បើករថយន្ដ Ford Ranger បុករះម៉ូតូនឹងរថយន្ដជាច្រើនគ្រឿង នៅ​ក្រោមស្ពានអាកាសឬស្សីកែវ ក្នុងសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ៕អត្ថបទបាន ចក់