ភ្លៀងធ្លាក់យ៉ាងគំហុកបានវាយប្រហារទៅលើទីក្រុងហិរញ្ញវត្ថុ ម៉ុមបៃ (Mumbai) របស់ឥណ្ឌា ដោយបង្កឱ្យមានទឹកជំនន់ និងបានសម្លាប់មនុស្សយ៉ាងហោចណាស់ ៤នាក់ ព្រមទាំងធ្វើឱ្យទីក្រុងត្រូវជន់លិច និងបង្ខំឱ្យសាលារៀនត្រូវបិទនៅថ្ងៃព្រហស្បតិ៍ (២៦ កញ្ញា) នេះ។

ផ្នែកខ្លះនៃទីក្រុង Mumbai បានកត់ត្រាទឹកភ្លៀងប្រហែល ២៧៥មីលីម៉ែត្រ (១១ អ៊ីញ) កាលពីល្ងាចថ្ងៃពុធ ដែលបានធ្វើឱ្យចរាចរផ្លូវថ្នល់មានការរំខាន និងពន្យារពេលរថភ្លើងដែលប្រជាជនក្នុងទីក្រុងរាប់លាននាក់ប្រើប្រាស់ជារៀងរាល់ថ្ងៃ។ ក្រុមមន្ត្រីនិយាយថា មនុស្ស ៤នាក់បានស្លាប់ដោយសារឧបទ្ទវហេតុទាក់ទងនឹងភ្លៀង។

ដោយរំពឹងថានឹងមានភ្លៀងធ្លាក់កាន់តែខ្លាំង អាជ្ញាធរបានចេញសេចក្តីជូនដំណឹងពណ៌ក្រហមទូទាំងទីក្រុង និងបានជំរុញឱ្យប្រជាពលរដ្ឋស្នាក់នៅក្នុងលំនៅឋាន។ សាលារៀន និងមហាវិទ្យាល័យនានាត្រូវបានបិទ ហើយអ្នកនេសាទត្រូវបានស្នើមិនឱ្យចេញទៅសមុទ្ររហូតដល់ថ្ងៃសុក្រ (២៧ កញ្ញា) ស្អែកនេះ។ វីដេអូដែលបង្ហោះលើប្រព័ន្ធផ្សព្វផ្សាយសង្គម បានបង្ហាញផ្លូវកកស្ទះចរាចរណ៍ ខណៈអ្នកធ្វើដំណើររាប់រយពាន់នាក់បានជាប់គាំងជាច្រើនម៉ោង។

ក្រសួងឧតុនិយមឥណ្ឌា (IMD) បាននិយាយនៅក្នុងសេចក្តីថ្លែងការណ៍មួយថា ភ្លៀងមូសុងរបស់ឥណ្ឌា បានចាប់ផ្តើមឈប់ធ្លាក់ពីភាគពាយព្យនៃប្រទេសកាលពីដើមសប្តាហ៍នេះ ពោលគឺជិតមួយសប្តាហ៍យឺតជាងធម្មតា។ ជាទូទៅភ្លៀងមូសុង ចាប់ផ្តើមធ្លាក់នៅក្នុងខែមិថុនា ហើយចាប់ផ្តើមឈប់វិញនៅថ្ងៃទី១៧ ខែកញ្ញា ប៉ុន្តែភ្លៀងនៅតែបន្តនៅឆ្នាំនេះ ដែលបានជួយបំពេញអាងស្តុកទឹក ប៉ុន្តែក៏បានធ្វើឱ្យខូចខាតដល់ការប្រមូលផលដំណាំនៅក្នុងរដ្ឋមួយចំនួនផងដែរ៕