ក្រសួងពាណិជ្ជកម្មចិន បាននិយាយនៅថ្ងៃព្រហស្បតិ៍ (២៦ កញ្ញា) នេះថា ប្រទេសចិន បានចាប់ផ្តើមការស៊ើបអង្កេតប្រឆាំងនឹងការរើសអើងអាជីវកម្មថ្មីមួយ ទល់នឹងវិធានការរឹតបន្តឹងដែលធ្វើឡើងដោយប្រទេសកាណាដា រួមទាំងពន្ធបន្ថែមលើរថយន្តអគ្គិសនីរបស់ចិន ផលិតផលដែក និងអាលុយមីញ៉ូម។

ក្រសួងបាននិយាយថា ការស៊ើបអង្កេតប្រភេទនេះជាធម្មតាត្រូវចំណាយពេលបីខែដើម្បីបញ្ចប់ ប៉ុន្តែអាចត្រូវពន្យារពេលក្រោមកាលៈទេសៈពិសេស។

ទីក្រុងប៉េកាំង ក្នុងខែនេះ ក៏បានប្រកាសផែនការស៊ើបអង្កេតការនាំចូលដំណាំផលិតប្រេង កាណូឡា របស់កាណាដា បន្ទាប់ពីទីក្រុងអូតាវ៉ា បានចូលរួមជាមួយសហរដ្ឋអាមេរិក និងសហភាពអឺរ៉ុប ក្នុងការដាក់ពន្ធ ១០០% លើរថយន្តអគ្គិសនីចិន និង ២៥% លើអាលុយមីញ៉ូម និងដែកថែបរបស់ចិន។

ជាងពាក់កណ្តាលនៃដំណាំផលិតប្រេង កាណូឡា ដែលនាំចេញពីកាណាដា គឺចូលទៅកាន់ប្រទេសចិន ដែលជាអ្នកនាំចូលគ្រាប់ធញ្ញជាតិផលិតប្រេងដ៏ធំបំផុតរបស់ពិភពលោក។ ចិនបាននិយាយថា ខ្លួនខកចិត្តយ៉ាងខ្លាំង និងប្រឆាំងយ៉ាងម៉ឺងម៉ាត់ចំពោះ “វិធានការរឹតត្បិតឯកតោភាគីដ៏រើសអើង” របស់កាណាដា ហើយខ្លួនបានស្នើការពិភាក្សាជាមួយកាណាដា នៅអង្គការពាណិជ្ជកម្មពិភពលោក WTO អំពីពន្ធគយទាំងនោះ។

ភាពតានតឹងផ្នែកពាណិជ្ជកម្មរវាងប្រទេសទាំងពីរ បានកើនឡើងខ្លាំងក្នុងសប្តាហ៍នេះ បន្ទាប់ពីកាណាដា និយាយថា ខ្លួនពិតជា “ពិចារណា” លើការហាមឃាត់កម្មវិធី សូហ្វវែរ (software) ដែលផលិតដោយចិននៅក្នុងរថយន្តអគ្គិសនី ក្នុងចំណោមវិធានការផ្សេងទៀតដើម្បីទប់ទល់នឹងអ្វីដែលខ្លួនហៅថាភាពលើសចំណុះ និងការគំរាមកំហែងផ្នែកសន្តិសុខ៕