​អាល្លឺម៉ង់៖ ការបោះឆ្នោត​បាន​បិទ​បញ្ចប់ ហើយ​គណបក្ស​ប្រជាធិបតេយ្យ​សង្គមនិយម​ឆ្វេង​និយម​កណ្ដាល​របស់​​អាល្លឺម៉ង់ (SPD) បាន​អះ​អាង​ថា ​ទទួល​បាន​ជ័យជំនះ​នៅ​ក្នុង​ការបោះ​ឆ្នោត​សហព័ន្ធ​។ ប៉ុន្តែ​ប្រទេស​នេះ​មិនទាន់​ដឹង​ច្បាស់​ថា ​អ្នកណា​នឹង​ក្លាយជា​មេដឹកនាំ​បន្ទាប់​របស់ខ្លួន​ទេ​។​

​ឥឡូវនេះ​ដំណើរការ​ស្មុគស្មាញ​នៃ​ការបង្កើត​រដ្ឋាភិបាលចំរុះ​បានចាប់ផ្តើម​ហើយ​។​ ​មេដឹកនាំ SPD លោក Olaf Scholz ចង់​ធ្វើការ​ជាមួយ​គណបក្សបៃតង និង​បក្ស​សេរីនិយម​។ ប៉ុន្តែ​គូប្រជែង​របស់លោក​មក​ពី​គណបក្ស​អភិរក្សគឺលោក Armin Laschet នឹងមិន​ចុះចាញ់​ដោយ​ងាយ​នោះទេ​។ ​ការពិភាក្សា​អាច​ចំណាយពេល​ច្រើន​ខែ​។ រហូតមកដល់​ពេលនេះ​លោកស្រី Angela Merkel នឹង​នៅតែ​បន្ត​កាន់តំណែង​នៅឡើយ​។ ​ប្រជាពលរដ្ឋ​អាល្លឺម៉ង់​បាន​ចេញទៅ​បោះឆ្នោត​កាលពី​ថ្ងៃទី២៦ ខែកញ្ញា​។ នោះ​គឺជា​ការបោះឆ្នោត​ដ៏​សំខាន់​មួយ​ព្រោះថា អធិការ​បតី​ថ្មីនឹង​ជំនួស​លោកស្រី Angela Merkel ដែល​បាន​កាន់អំណាច​រយៈពេល ១៦ឆ្នាំ។​

នេះ​គឺជា​ការប្រណាំង​ប្រជែង​ដ៏​តឹងតែង​បំផុត ប៉ុន្តែ​គ្មាន​គណបក្ស​ណាមួយ​ទទួលបាន​សំឡេងគាំទ្រ​គ្រប់គ្រាន់ ​ដើម្បី​បង្កើត​សំឡេង​ភាគច្រើន​នៅក្នុង​សភា​អាល្លឺម៉ង់​ ឬ Bundestag បានទេ​។​ ​នោះ​មានន័យថា​ រដ្ឋាភិបាលចម្រុះ​មួយ​ត្រូវតែ​បង្កើតឡើង​។ នេះ​មិនមែនជា​រឿង​ថ្មី​ទេ​សម្រាប់​អាល្លឺម៉ង់​ព្រោះ​ចាប់តាំងពី​សង្គ្រាមលោកលើកទី២ មក​គ្មាន​គណបក្ស​ណាមួយ​ធ្លាប់​ទទួលបាន​អាសនៈ​គ្រប់គ្រាន់​ ដើម្បី​បង្កើត​រដ្ឋាភិបាល​ដោយ​ខ្លួនឯង​បានទេ​៕

អត្ថបទ៖ សុខមាន