នៅក្នុងកិច្ចប្រជុំលើកដំបូងរបស់លោកជាមួយរដ្ឋាភិបាលថ្មី ប្រធានាធិបតីស៊ីរីលោក បាសា អាល់អាសាដ (Bashar al-Assad) បានអំពាវនាវឲ្យគាំទ្រប្រទេសលីបង់និងប្រជាជន ក្នុងការប្រឈមមុខនឹងការឈ្លានពានដ៏ឃោរឃៅរបស់អ៊ីស្រាអែល។

លោកប្រធានាធិបតី អាសាដ បានដឹកនាំកិច្ចប្រជុំណែនាំមួយសម្រាប់គណៈរដ្ឋមន្ត្រីថ្មី បន្ទាប់ពីរដ្ឋមន្ត្រី បានស្បថចូលកាន់តំណែងតាមរដ្ឋធម្មនុញ្ញ។

ប្រធានាធិបតីស៊ីរីរូបនេះ បាននិយាយថា ក្នុងចំណោមបញ្ហាសំខាន់បំផុតរដ្ឋាភិបាលនេះ គឺ«កិច្ចការចម្បងនាពេលបច្ចុប្បន្ននេះ ត្រូវតែជារបៀបដែលយើងអាចគាំទ្របងប្អូនរបស់យើង នៅក្នុងប្រទេសលីបង់លើគ្រប់ វិស័យ និងគ្រប់ផ្នែក ដោយពុំមានការស្ទាក់ស្ទើរ ក្នុងការប្រឆាំងនឹងការវាយប្រហារដ៏ខ្លាំងក្លារបស់អ៊ីស្រាអែល នៅលើទឹកដីលីបង់»។

រដ្ឋមន្ត្រីសុខាភិបាលលីបង់ បាននិយាយថា យ៉ាងហោចណាស់មនុស្ស ៥១នាក់ ត្រូវបានសម្លាប់ និង ២២៣នាក់ បានរងរបួស នៅក្នុងការវាយប្រហារឥតឈប់ឈរកាលពីថ្ងៃពុធ ដោយរបបជ្វីហ្វ។ 

នៅក្នុងការវាយប្រហាររបស់អ៊ីស្រាអែលលើប្រទេសលីបង់ ចាប់តាំងពីថ្ងៃទី ២៣ ខែកញ្ញា បន្ទាប់ពីឧបករណ៍ចាប់សញ្ញាអេឡិចត្រូនិក និងឧបករណ៍ទំនាក់ទំនងឥតខ្សែ ត្រូវបានបំផ្ទុះដោយការវាយប្រហារតាមអ៊ីនធឺណិត និងការបំផ្លិចបំផ្លាញរបស់អ៊ីស្រាអែល មនុស្សជាង ៥៧០នាក់ ត្រូវបានសម្លាប់ក្នុងនោះមានកុមារ ៥០ នាក់ និងស្ត្រី ៩៤នាក់។ គួរបញ្ជាក់ផងដែរថា មនុស្សប្រមាណ ១.៨៣៥នាក់ បានរងរបួស។