រដ្ឋអាជ្ញារដ្ឋ របស់ប្រទេសបេណាំង បានប្រកាសកាលពីថ្ងៃពុធ អំពីការចាប់ខ្លួនមនុស្សដ៏លេចធ្លោចំនួនបីរូប ពីបទសង្ស័យរៀបចំផែនការ «ធ្វើរដ្ឋប្រហារ» នៅក្នុងប្រទេស។

លោក អ៊ីឡុន ម៉ារីញ៉ូ ម៉េតុននូ(Elonm Mario Metonou) រដ្ឋអាជ្ញាពិសេសនៅតុលាការឧក្រិដ្ឋកម្មហិរញ្ញវត្ថុ និងភេរវកម្ម របស់ប្រទេសបេណាំង បាននិយាយក្នុងសន្និសីទសារព័ត៌មានថា អតីតរដ្ឋមន្ត្រីកីឡា មេបញ្ជាការឆ្មាំសាធារណរដ្ឋ និងអ្នកជំនួញម្នាក់ដែលស្និទ្ធទៅនឹងប្រធានាធិបតី លោក ផាទ្រីស តាឡុន(Patrice Talon) ត្រូវបានឃុំខ្លួនដោយចោទប្រកាន់ពីបទរៀបចំផែនការធ្វើរដ្ឋប្រហារ។ 

រដ្ឋអាជ្ញា បាននិយាយថា វាទំនងដែលថា មេបញ្ជាការឆ្មាំសាធារណរដ្ឋ ទទួលបន្ទុកសន្តិសុខរបស់ប្រធានាធិបតី បានរួមគ្នាជាមួយអតីតរដ្ឋមន្ត្រីកីឡា លោក អូស្វាល ហូមឃី(Oswald Homeky) និង អ្នកជំនួញលោក អីលីវីយ័រ បូកូ(Olivier Boko) ដើម្បីធ្វើរដ្ឋប្រហារដោយប្រើកងកម្លាំង នៅថ្ងៃទី២៧ ខែ កញ្ញា។

រដ្ឋអាជ្ញា និយាយថា លោក Homeky ត្រូវបានឃុំខ្លួនកាលពីថ្ងៃអង្គារ ខណៈបានប្រគល់សាច់ប្រាក់ចំនួន៦កញ្ចប់ដែលសរុបមានចំនួនប្រហែល២,៥លានដុល្លារអាមេរិក ទៅឱ្យមេបញ្ជាការឆ្មាំសាធារណរដ្ឋ។ 

លោកបាននិយាយថា ការស៊ើបអង្កេតកំពុងបន្តដើម្បីកំណត់អត្តសញ្ញាណជនសង្ស័យបន្ថែមទៀត។