អនុប្រធានាធិបតីអាមេរិក លោកស្រី Kamala Harris បានរិះគន់លោក Donald Trump ថា ជា «ជនបរាជ័យខ្លាំងបំផុត» ជុំវិញបញ្ហាសេដ្ឋកិច្ច និងជាមិត្តរបស់ក្រុមមហាសេដ្ឋី ខណៈដែលគូប្រជែង ក្នុងការបោះឆ្នោត បានដាក់ចេញនូវផែនការប្រកួតប្រជែង ស្ដីពីបញ្ហាធំៗ សម្រាប់អ្នកបោះឆ្នោតអាមេរិក។

នៅក្នុងសុន្ទរកថាស្តីពីសេដ្ឋកិច្ច ហើយបន្ទាប់មកម្តងទៀត នៅក្នុងបទសម្ភាសន៍ម្នាក់ឯងដំបូងរបស់លោកស្រី កាលពីថ្ងៃពុធ (ទី២៥ ខែកញ្ញា) បេក្ខជនខាងគណបក្សប្រជាធិបតេយ្យរូបនេះ បានព្រមានថា ផែនការរបស់លោក Trump ក្នុងការចាប់ផ្ដើមឡើងវិញនូវការយកពន្ធខ្ពស់លើការនាំចូលពីបរទេស នឹងធ្វើឲ្យប្រជាជនអាមេរិកវណ្ណៈកណ្តាលត្រូវចំណាយខ្ពស់ ដោយសារទំនិញឡើងថ្លៃ។

សម្រាប់លោក Trump បេក្ខជនរបស់គណបក្សសាធារណរដ្ឋរូបនេះ បានសង្កត់ធ្ងន់ទ្វេដងលើចក្ខុវិស័យគាំពារនិយមរបស់លោក ប៉ុន្តែបានចំណាយពេលវេលានិយាយច្រើន ពាក់ព័ន្ធនឹងការគំរាមកំហែងវាយអ៊ីរ៉ង់ឲ្យទៅជា «បំណែក» បន្ទាប់ពីការស៊ើបការណ៍សម្ងាត់របស់សហរដ្ឋអាមេរិក បានព្រមានពីការគំរាមកំហែងពីទីក្រុងតេអេរ៉ង់ ក្នុងការប៉ុនប៉ងយកជីវិតរបស់លោក។

លោកស្រី Harris និងអតីតប្រធានាធិបតី កំពុងមានភាពប្រកៀកប្រកិតគ្នា នៅក្នុងការស្ទង់មតិ ហើយអ្នកទាំង ២ កំពុងប្រឹងប្រែងចាប់យកបេះដូងរបស់អ្នកបោះឆ្នោតដែលមិនទាន់សម្រេចចិត្ត ដោយការប្ដេជ្ញាដោះស្រាយបញ្ហាសំខាន់ៗជាច្រើន ដូចជាសេដ្ឋកិច្ចជាដើម ខណៈរយៈពេលមិនដល់ជាង ៦សប្តាហ៍នោះទេ នឹងដល់ថ្ងៃបោះឆ្នោតហើយ។

លោកស្រី Harris បានប្តេជ្ញាថា នឹង «រៀបចំផ្លូវថ្មីមួយឆ្ពោះទៅមុខ» នៅក្នុងសុន្ទរកថា នាទីក្រុង Pittsburgh ជាទីក្រុងឧស្សាហកម្មក្នុងរដ្ឋ Pennsylvania ដែលមានការប្រែប្រួលយ៉ាងខ្លាំង ដោយវោហាសាស្ត្ររបស់លោកស្រីផ្តោតលើការធ្វើឲ្យតម្លៃទំនិញធ្លាក់ចុះ សម្រាប់ពលរដ្ឋអាមេរិក៕