មន្ទីរបញ្ចកោណ កាលពីថ្ងៃពុធ (ទី២៥ ខែកញ្ញា) បាននិយាយថា យោធាសហរដ្ឋអាមេរិកមិនបានផ្តល់ការគាំទ្រផ្នែកចារកម្មណាមួយដល់អ៊ីស្រាអែលនោះទេ សម្រាប់ប្រតិបត្តិការរបស់ប្រទេសនេះ នៅក្នុងប្រទេសលីបង់។

ជាមួយគ្នានេះ អ្នកនាំពាក្យមន្ទីរបញ្ចកោណ លោកស្រី Sabrina Singh ក៏បាននិយាយផងដែរថា មិនមានការលុកលុយផ្លូវគោករបស់អ៊ីស្រាអែលចូលទៅក្នុងប្រទេសលីបង់ ទំនងជាជិតកើតមាននោះទេ ប៉ុន្តែបានបញ្ជូនអ្នកសារព័ត៌មានទៅអ៊ីស្រាអែល ដើម្បីសួរអំពីប្រតិបត្តិការ និងផែនការរបស់ប្រទេសនេះ។

នៅពេលត្រូវបានសួរអំពីថា តើសហរដ្ឋអាមេរិកកំពុងគាំទ្រប្រតិបត្តិការរបស់អ៊ីស្រាអែល នៅលីបង់ ក្នុងនោះរួមទាំងការគាំទ្រផ្នែកចារកម្មដែរ ឬអត់ លោកស្រី Singh បានឆ្លើយថា៖ «អត់ទេ គ្មានការគាំទ្រទេ»។ លោកស្រីបានប្រាប់ថា៖ «នៅពេលនិយាយអំពីប្រទេសលីបង់ យោធាសហរដ្ឋអាមេរិក មិនមានការពាក់ព័ន្ធក្នុងប្រតិបត្តិការរបស់អ៊ីស្រាអែលនោះទេ»។

យ៉ាងណាក្ដី គេនៅមិនច្បាស់ទេថា តើការកត់សម្គាល់របស់លោកស្រី Singh មានពាក់ព័ន្ធនឹងការចែករំលែកព័ត៌មានសម្ងាត់របស់សហរដ្ឋអាមេរិក ក្នុងពេលជាក់ស្តែងណាមួយ ជុំវិញមីស៊ីលរបស់ក្រុមហេសបូឡា ដែលអាចនឹងបាញ់ឆ្ពោះទៅអ៊ីស្រាអែលដែរ ឬទេ។

ប្រមុខយោធាអ៊ីស្រាអែល បានប្រាប់ទាហានកាលពីថ្ងៃពុធថា ការវាយប្រហារតាមអាកាស នៅលីបង់ នឹងបន្តមានក្នុងគោលបំណងបំផ្លាញហេដ្ឋារចនាសម្ព័ន្ធរបស់ក្រុមហេសបូឡា និងដើម្បីរៀបចំផ្លូវ សម្រាប់ប្រតិបត្តិការជើងគោកដែលអាចមានដោយកងកម្លាំងអ៊ីស្រាអែល។ 

គួរបញ្ជាក់ថា ការវាយប្រហារតាមអាកាសរបស់អ៊ីស្រាអែលក្នុងសប្តាហ៍នេះ បានកំណត់គោលដៅទៅលើមេដឹកនាំក្រុមហេសបូឡា និងបានវាយប្រហារទីតាំងរាប់រយកន្លែងចូលយ៉ាងជ្រៅទៅក្នុងប្រទេសលីបង់ ជាកន្លែងដែលមនុស្សរាប់សែននាក់ បានភៀសខ្លួនចេញពីតំបន់ព្រំដែន ខណៈដែលក្រុមនេះបានបាញ់រ៉ូកែតជាច្រើនគ្រាប់ចូលទឹកដីអ៊ីស្រាអែល៕