នៅថ្ងៃព្រហស្បតិ៍នេះ រដ្ឋ Florida របស់សហរដ្ឋអាមេរិក ប្រឈមនឹងផលប៉ះពាល់ដ៏គ្រោះថ្នាក់ ដោយសារព្យុះសង្ឃរា Helene ។

ព្យុះសង្ឃរា Helene បានបោកបក់ដល់តំបន់ឈូងសមុទ្រម៉ិកស៊ិកកាលពីរសៀលថ្ងៃពុធ ហើយវាត្រូវបានគេព្យាករណ៍ថា នឹងបង្កើនកម្លាំងរបស់វាទៅជាព្យុះកម្រិតទី ៤ ជាមួយនឹងល្បឿនខ្យល់បក់ ២៥០គ.មក្នុង ១ម៉ោង មុនពេលបោកបក់ដល់ដីគោកនៅតំបន់ជ្រោយរដ្ឋ Florida នាល្ងាចថ្ងៃព្រហស្បតិ៍ ។

លោក Jamie Rhome គឺជាអនុប្រធានមន្ទីរព្យុះសង្ឃរាជាតិសហរដ្ឋអាមេរិក និយាយថា ខ្យល់បក់ខ្លាំង នឹងមានផលប៉ះពាល់ដល់អ្នករស់នៅតាមផ្លូវបោកបក់របស់ព្យុះ ។

នៅទីក្រុង Clearwater ប្រជាពលរដ្ឋបានរៀបចំបាវខ្សាច់ ជាការត្រៀមខ្លួនចំពោះការកញ្រ្ជោលឡើងរបស់ព្យុះគំរាមកំហែងដល់អាយុជីវិតមួយនេះ ។

មន្ទីរព្យុះសង្ឃរាជាតិ និយាយថា ព្យុះ Helene នឹងបណ្តាលឲ្យមានទឹកភ្លៀងកម្ពស់ ៣៨សង់ទីម៉ែត្រ នៅតាមតំបន់មួយចំនួន ក្រោយវាបោកបក់ដល់ដីគោក និងបណ្តាលឲ្យមានទឹកជំនន់ធ្ងន់ធ្ងរផងដែរ ។

ពួកគេបន្តថា មនុស្សជាង ៤០លាននាក់ នៅរដ្ឋ Florida, Georgia និងរដ្ឋ Alabama ស្ថិតក្រោមការប្រកាសអាសន្នពីព្យុះសង្ឃរា និងព្យុះត្រូពិក ។

ការជម្លៀសខ្លួន ត្រូវបានបញ្ជាផងដែរនៅតាមបណ្តាលឆ្នេរមួយចំនួនក្នុងតំបន់ឈូងសមុទ្ររដ្ឋ Florida ហើយស្រុកជាច្រើន បានបិទសាលារៀនផងដែរ ៕