ប្រធានសភាតំណាងរាស្រ្តអាមេរិកមកពីសាធារណរដ្ឋ កាលពីថ្ងៃពុធ (ទី២៥ ខែកញ្ញា) បានទាមទារថាប្រធានាធិបតីអ៊ុយក្រែនលោក Volodymyr Zelensky គួរដកឯកអគ្គរដ្ឋទូតរបស់លោក ប្រចាំនៅសហរដ្ឋអាមេរិក ជុំវិញការធ្វើដំណើរទស្សនកិច្ចរបស់លោក Zelensky នាសប្តាហ៍នេះទៅកាន់រោងចក្រ ក្នុងរដ្ឋ Pennsylvania។

នៅក្នុងលិខិតមួយផ្ញើទៅលោក Zelensky ប្រធានសភា លោក Mike Johnson បានសរសេររៀបរាប់ថា៖ «ខ្ញុំទាមទារឲ្យអ្នកបណ្តេញឯកអគ្គរដ្ឋទូតអ៊ុយក្រែន ប្រចាំនៅសហរដ្ឋអាមេរិក លោកស្រី Oksana Markarova ជាបន្ទាន់»។ លោក Johnson បានចេញលិខិតនោះមួយថ្ងៃ មុនពេលដែលលោក Zelensky នឹងត្រូវទៅបំពេញទស្សនកិច្ច នៅវិមាន Capitol របស់អាមេរិក ក្នុងទីក្រុងវ៉ាស៊ីនតោន ដើម្បីជួបជាមួយសមាជិកសភា។

គេមិនរំពឹងថា លោក Johnson នឹងជួបជាមួយមេដឹកនាំអ៊ុយក្រែននោះទេ។ ស្ថានទូតអ៊ុយក្រែនប្រចាំទីក្រុងវ៉ាស៊ីនតោនមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

សមាជិករបស់គណបក្សសាធារណរដ្ឋមួយចំនួន បានបង្ហាញការខឹងសម្បា ចំពោះដំណើរទស្សនកិច្ចរបស់លោក Zelensky កាលពីដើមសប្តាហ៍មុន ក្នុងដំណើររយៈពេលមួយសប្តាហ៍របស់លោក នៅសហរដ្ឋអាមេរិក ទៅកាន់រោងចក្រផលិតគ្រាប់រំសេវ នៅឯក្រុងកំណើតរបស់ប្រធានាធិបតី លោក Joe Biden គឺទីក្រុង Scranton ក្នុងរដ្ឋ Pennsylvania៕