​បាល់ទាត់៖ ក្រុមបាល់ទាត់​ជំរើសជាតិ​អា​ហ្ស​ង់​ទីន​បាន​កោះហៅ​កីឡាករ​ ៣នាក់​ពី​ក្របខណ្ឌ English Premier League សំរាប់​ការប្រកួត​ជំ​រុះ World Cup នៅ​ខែតុលា​ខាងមុខ បើទោះជា​អា​ហ្ស​ង់​ទីន​នៅតែ​ស្ថិតក្នុង​បញ្ជី​ក្រហម​របស់​អង់គ្លេស​ក៏ដោយ​។

​​កាលពី​ខែ​មុន ក្លិប​បាល់ទាត់​នៅ​អង់គ្លេស​មួយចំនួន​បាន​បដិសេធ ​មិនឱ្យ​កីឡាករ​របស់ខ្លួន​ចាកចេញនៅពេល​ត្រូវបាន​កោះហៅ ​ដោយ​ក្រុម​ជំរើសជាតិ​នៅ​តំបន់​អាមេរិក​ខាងត្បូង​។​ ​​តាំងពី​ថ្ងៃ​សុក្រ​សប្តាហ៍​មុន ជនបរទេស​ដែល​ធ្វើដំណើរ​ចូល​ទឹកដី​អា​ហ្ស​ង់​ទីន​មិន​តម្រូវឱ្យធ្វើ​ច​ត្តា​ឡី​ស័ក​ឡើយ​ ប្រសិនបើ​អ្នកដំណើរ​ទាំងនោះ​បានទទួល​ការចាក់​វ៉ាក់សាំង​គ្រប់​ចំនួន​ដូ​ស និង​តេស្ត​អវិជ្ជមាន Covid-19​។​ ​​ផ្ទុយទៅវិញ​អ្នកដំណើរ​ដែល​ធ្វើដំណើរ​ចូល​ទឹកដី​អង់គ្លេស​វិញ​ពី​អា​ហ្ស​ង់​ទីន​ត្រូវធ្វើ​ច​ត្តា​ឡី​ស័ក ១០ថ្ងៃ​គ្មាន​ការលើកលែង​។

​​អ្នកចាំទី Aston Villa, Emiliano Martinez និង​កីឡាករ​របស់ Spurs ពីររូប​រួមមាន Giovani lo Celso និង Cristian Romero ត្រូវបាន​កោះហៅ​ចូល​ក្រុម​ជំរើសជាតិ​អា​ហ្ស​ង់​ទីន​សំរាប់​ការប្រកួត​ជំ​រុះ World Cup ខែតុលា​ខាងមុខនេះ​ចន្លោះ​ថ្ងៃទី៨ ដល់​ថ្ងៃទី១៥ ដែល​រួមមាន​ជួប​ជាមួយប៉ា​រ៉ា​ហ្កា​យ អ៊ុយ​រូ​ហ្កា​យ និង​ប៉េរូ​។ ​​ចំណែក Aston Villa និង Tottenham Hotspur សុទ្ធតែ​មានការ​ប្រកួត​នៅ​ចុង​សប្តាហ៍​ថ្ងៃទី១៦ និង ១៧ ខែតុលា​។ ​អា​ហ្ស​ង់​ទីន​កំពុង​តាម​ពីក្រោយ​ក្រុម​កំពូល​តារាង​ប្រេ​ស៊ី​ល ៦ពិន្ទុ​ក្នុង​វគ្គ​ជំ​រុះ​នៅ​តំបន់​អាមេរិក​ខាងត្បូង​នេះ​ ក្រោយ​ប្រកួត ៨លើក​ឈ្នះ៥៕

​អត្ថបទ​៖​នាង សុភា​វុ​ធ