ក្រសួងការពារជាតិរុស្ស៊ី និយាយនៅថ្ងៃអង្គារនេះថា រុស្ស៊ី និងចិន បានបន្តសមយុទ្ធយោធាកងទ័ពជើងទឹករួមគ្នា នៅក្នុងសមុទ្រ Okhotsk ស្ថិតនៅតំបន់ប៉ាស៊ីហ្វិកខាងលិច ។

ក្រសួងការពារជាតិរុស្ស៊ី បន្តថា សមយុទ្ធនេះ ដែលជាផ្នែកមួយនៃសមយុទ្ធកងទ័ពជើងទឹកចិន-រុស្ស៊ី "Beibu/Interaction - 2024" មានការចូលរួមពីកងនាវាចម្បាំងមកពីកងនាវាប៉ាស៊ីហ្វិក និងកងទ័ពជើងទឹកចិន ដោយធ្វើសមយុទ្ធកងទ័ពជើងទឹក ការធ្វើនាវាចរណ៍តាមលំដាប់ ការការពារដែនអាកាស ក៏ដូចជាការការពារកងនាវាចម្បាំង នៅតាមផ្លូវដែលគ្មានការការពារ ។

គួរឲ្យដឹងថា កាលពីខែកក្កដាកន្លងទៅ ចិន និងរុស្ស៊ី បានធ្វើសមយុទ្ធកងទ័ពជើងទឹករួមគ្នានៅជិតទីក្រុង Zhanjianស្ថិតនៅភាគខាងត្បូងប្រទេសចិន និងបានល្បាតរួមគ្នាដាច់ដោយឡែកមួយទៀត នៅក្នុងមហាសមុទ្រប៉ាស៊ីហ្វិក ក្នុងខែកក្កដានោះ ។

ការល្បាតរួមគ្នានៅក្នុងមហាសមុទ្រប៉ាស៊ីហ្វិក ត្រូវបានធ្វើឡើងជារៀងរាល់ឆ្នាំ ចាប់តាំងពីឆ្នាំ ២០២១រហូតមក ប៉ុន្តែធ្វើតែម្តងគត់ក្នុង ១ឆ្នាំ ហើយឆ្នាំនេះ មានការផ្លាស់ប្តូរជាមួយនឹងការល្បាត ២លើក ។ 

ដោយឡែក កាលពីខែសីហា ឆ្នាំមុន ការល្បាតរួមគ្នារបស់រុស្ស៊ី និងចិន បានធ្វើឡើងនៅជិតរដ្ឋ Alaska និងកោះ Aleutian របស់សហរដ្ឋអាមេរិក ៕