នៅក្នុងសេចក្តីថ្លែងការណ៍មួយនៅលើបណ្តាញ Telegram ក្រុមប្រដាប់អាវុធអ៊ីរ៉ាក់ បាននិយាយថា ខ្លួនបានវាយប្រហារ«ដោយយានដ្រូន» ទៅលើគោលដៅយោធា នៅភាគខាងជើង«នៃទឹកដីដែលគ្រប់គ្រង ដោយអ៊ីស្រាអែល»។ 

សារព័ត៌មាន The Times of Israel បានភ្ជាប់ការវាយប្រហារទៅនឹងសំឡេងស៊ីរ៉ែន ដែលបន្លឺឡើង នៅក្នុងតំបន់ខ្ពង់រាប Golan Heights ហើយបាននិយាយថា ពុំមានការរាយការណ៍អំពីអ្នករងរបួសទេ។

ក្រុមតស៊ូឥស្លាមនៅអ៊ីរ៉ាក់ បានធ្វើការវាយប្រហារដោយគ្រាប់រ៉ូកែត និងយានដ្រូនរាប់សិបលើកលើគោលដៅក្នុងប្រទេសអ៊ីស្រាអែល ក៏ដូចជាកងកម្លាំងអាមេរិកនៅអ៊ីរ៉ាក់ និងស៊ីរី ចាប់តាំងពីសង្គ្រាមរបស់អ៊ីស្រា  អែលលើតំបន់ហ្កាហ្សា បានចាប់ផ្តើម។

កម្លាំងតស៊ូនៅអ៊ីរ៉ាក់ បានប្រកាសគាំទ្រការតស៊ូនៅលីបង់ និងប៉ាឡេស្ទីន។

សារព័ត៌មានអារ៉ាប់ Al-Arabi al-Jadeed បានរាយការណ៍ថា ក្រុមតស៊ូអ៊ីរ៉ាក់ បានយល់ព្រមផ្តល់ការគាំទ្រដោយផ្ទាល់ដល់ក្រុមហេសបូឡា នៅក្នុងព្រឹត្តិការណ៍នៃប្រតិបត្តិការជើងគោកដ៏មានសក្តានុពលដោយកងទ័ពអ៊ីស្រាអែល នៅភាគខាងត្បូងប្រទេសលីបង់។

ក្រុមទាំងនេះ បានប្តេជ្ញាផ្គត់ផ្គង់សព្វាវុធ និងយន្តហោះចម្បាំង ក៏ដូចជាបន្តការវាយប្រហារដោយយានដ្រូន និងមីស៊ីលពីក្នុងប្រទេសអ៊ីរ៉ាក់ និងស៊ីរី ដែលកំណត់គោលដៅទៅលើទីតាំងមួយចំនួន នៅក្នុងដែនដីប៉ាឡេស្ទីនដែលគ្រប់គ្រងដោយអ៊ីស្រាអែល។