ក្រុមអាជ្ញាធរនិយាយថា ការវាយប្រហារដោយយានដ្រូនទាំងយប់របស់រុស្ស៊ីលើអ៊ុយក្រែន បានសម្លាប់មនុស្សម្នាក់ និងធ្វើឲ្យខូចខាតហេដ្ឋារចនាសម្ព័ន្ធជាច្រើនទៀត ។

យោធាទីក្រុងគីវ និយាយថា កងកម្លាំងរុស្ស៊ី បានវាយប្រហារដោយយានដ្រូន ៧៨គ្រឿង និងមីស៊ីល ៦គ្រាប់លើតំបន់ជាច្រើននៅទូទាំងប្រទេស អំឡុងការវាយប្រហាររយៈច្រើនម៉ោងរបស់ពួកគេ ។

ពួកកេបន្តថា ប្រព័ន្ធការពារដែនអាកាស បានបំផ្លាញយានដ្រូន ៦៦គ្រឿង និងមីស៊ីល ៤គ្រាប់ ។

លោក Serhiy Popko គឺជាប្រធានរដ្ឋបាលយោធាក្នុងស្រុក និយាយថា យានដ្រូនរាប់សិបគ្រឿង ត្រូវបានបំផ្លាញនៅរដ្ឋធានីគីវ ជាទីដែលរថយន្ត ២០គ្រឿង រងការខូចខាត ។

លោក Ihor Klymenko គឺជារដ្ឋមន្រ្តីក្រសួងមហាផ្ទៃអ៊ុយក្រែន និយាយនៅលើបណ្តាញព័ត៌មានសង្គមថា ស្រ្តីម្នាក់ បានស្លាប់នៅក្នុងការវាយប្រហារដោយមីស៊ីលនៅទីក្រុងភាគខាងត្បូង Odesa ហើយមនុស្ស ៨នាក់ផ្សេងទៀត បានរងរបួស នៅក្នុងការវាយប្រហារដោយគ្រាប់បែកតម្រង់គោលដៅលើទីក្រុងភាគអាគ្នេយ៍ Zaporizhzhia ។

ដោយឡែក លោក Svitlana Onyshchuk គឺជាអភិបាលក្នុងតំបន់ និយាយថា តំបន់មួយចំនួននៃទីក្រុង Ivano-Frankivsk គ្មានចរន្តអគ្គិសនីប្រើប្រាស់ ក្រោយការវាយប្រហាររបស់រុស្ស៊ី លើហេដ្ឋារចនាសម្ព័ន្ធសំខាន់នៅទីនោះ ។

សូមបញ្ជាក់ថា រុស្ស៊ីតែងតែវាយប្រហារដោយយានដ្រូន និងមីស៊ីលើទីក្រុងតូច-ធំជាច្រើនរបស់អ៊ុយក្រែន នៅតាមខ្សែត្រៀមមុខ ចាប់តាំងពីពួកគេបានវាយលុកប្រទេសជិតខាងមួយនេះ កាលពីខែកុម្ភៈ ឆ្នាំ ២០២២កន្លងទៅ ៕