នាយករដ្ឋមន្ត្រីរបស់ប្រទេសប៉េរូ បាននិយាយថា រដ្ឋាភិបាលរបស់ប្រទេស កាលពីថ្ងៃព្រហស្បតិ៍ បានប្រកាសរដ្ឋក្នុងគ្រាអាសន្នរយៈពេល៦០ថ្ងៃ នៅក្នុងស្រុកជាច្រើនជុំវិញទីក្រុងលីម៉ា ដើម្បីប្រយុទ្ធប្រឆាំងការកើនឡើងឧក្រិដ្ឋកម្ម ខណៈអ្នកបើកបររថយន្តក្រុងដែលធ្វើកូដកម្ម បានធ្វើឲ្យរាំងស្ទះចរាចរណ៍ក្នុងគោលបំណងជំរុញសន្តិសុខ។

វិធានការនេះ នឹងដាក់កងកម្លាំងប្រដាប់អាវុធរបស់ប្រទេសប៉េរូ នៅតាមដងផ្លូវ ដើម្បីទប់ទល់ទៅនឹងរលកនៃការជំរិតទារប្រាក់ ដែលបានផ្ទុះឡើងនៅក្នុងរដ្ឋធានីរបស់ប្រទេស។

រូបភាពទូរទស្សន៍ក្នុងស្រុកបានបង្ហាញ បណ្តាញដឹកជញ្ជូនសាធារណៈ បានខ្វះកាលពីថ្ងៃព្រហស្បតិ៍ ខណៈអ្នកធ្វើដំណើររាប់ពាន់នាក់ត្រូវបានទុកចោលនៅចំណតរថយន្តក្រុង និងមិនអាចធ្វើដំណើរទៅធ្វើការបាន។

រដ្ឋាភិបាល បានផ្អាកសាលារៀន និងបានជំរុញឱ្យក្រុមហ៊ុននានាអនុញ្ញាតឱ្យធ្វើការពីចម្ងាយ ឬអនុញ្ញាតឱ្យបុគ្គលិកចូលធ្វើការយឺត ចំពោះការផ្លាស់វេនការងារ។

នគរបាលនិយាយថា អ្នកបើកបររថយន្តក្រុងម្នាក់ត្រូវបានសម្លាប់កាលពីថ្ងៃអាទិត្យ សម្រាប់ការបដិសេធមិនព្រមចូលខ្លួនឲ្យឆែកឆេរ ដោយបានបើកបរគេចខ្លួន ហើយអ្នកដំណើរម្នាក់ទៀតក៏បានរងរបួសផងដែរ។

អ្នកបើកបរបួននាក់ ត្រូវបានសម្លាប់ចាប់តាំងពីចុងខែសីហា មក។ នាយករដ្ឋមន្ត្រី លោក ហ្គាស់ស្តាវ៉ូ អាដ្រៀនហ្សេន(Gustavo Adrianzen) បាននិយាយថា រដ្ឋក្នុងគ្រាអាសន្ន ត្រូវបានអនុវត្តនៅក្នុងស្រុកចំនួន១២ ជុំវិញទីក្រុងលីម៉ា និងទីក្រុងកាល់ឡៅ(Callao) ដែលនៅជិតខាង។