ការវាយប្រហាររបស់អ៊ីស្រាអែលលើគោលដៅរបស់ក្រុមហេសបូឡា បានប៉ះពាល់ដ៏គួរឱ្យភ័យខ្លាចដល់ជនស៊ីវិលក្នុងតំបន់ ដែលត្រូវបានបង្ខំឱ្យរត់ភៀសខ្លួនចេញពីកន្លែងមួយទៅកន្លែងមួយដើម្បីស្វែងរកសុវត្ថិភាព។

ការវាយប្រហារឆ្លងព្រំដែនដោយអ៊ីស្រាអែល និងក្រុមហេសបូឡា បានបណ្ដាលឱ្យមនុស្សរាប់ម៉ឺននាក់ត្រូវរត់ភៀសខ្លួនគេចចេញពីគ្រាប់បែកនៅសងខាងប្រទេសទាំង២។

ក្នុងប្រទេសលីបង់ ការវាយប្រហារតាមអាកាសនៅតែបន្តរបស់អ៊ីស្រាអែលបានធ្វើឲ្យចំនួនមនុស្សស្លាប់កើនឡើងដល់ជាង៦០០នាក់ និងបានធ្វើឱ្យមនុស្សរាប់ពាន់នាក់រងរបួស និង ប្រជាពលរដ្ឋប្រមាណ ៩០.០០០នាក់ទៀតភៀសខ្លួន។    

អ្នកដែលបោះបង់ផ្ទះសម្បែងមួយចំនួនបានប្រាប់ទូរទស្សន៍ BBC ពីហេតុការណ៍ដែលពួកគេធ្លាប់បានឆ្លងកាត់ ដោយទុកចោលទ្រព្យសម្បត្តិ ហើយត្រូវពឹងលើមនុស្សចម្លែកដើម្បីរស់។ការប៉ះទង្គិចគ្នាជិតមួយឆ្នាំបានដេញមនុស្សរាប់ម៉ឺននាក់ដែលរត់ភៀសខ្លួនដើម្បីមានជីវិតរស់រួចមកហើយ ភាគច្រើនមកពីតំបន់ព្រំដែនភាគខាងត្បូង និងជ្រលងភ្នំ បេកាអា (Bekaa) ភាគខាងកើតលីបង់។ 

ខណៈអំពើហិង្សាបានកើនឡើងយ៉ាងឆាប់រហ័សក្នុងប៉ុន្មានថ្ងៃថ្មីៗនេះ មនុស្សជាច្រើនទៀតបានភៀសខ្លួនពោពេញដោយភាពរងទុក្ខ។ព្រោះតែប្រទេសលីបង់ហ៊ុំព័ទ្ធដោយអ៊ីស្រាអែល និងសមុទ្រមេឌីទែរ៉ាណេ ការឆ្លងចូលទៅក្នុងប្រទេសស៊ីរី គឺជាជម្រើសតែមួយគត់ដែលអាចរកបានសម្រាប់ការចាកចេញតាមផ្លូវគោក ទោះដឹងថាស៊ីរីជាប្រទេសហែកហួរដោយសង្រ្គាមស្រាប់ក៏ដោយ។

ក្រុមអាជ្ញាធរលីបង់បាននិយាយកាលពីថ្ងៃព្រហស្បតិ៍សប្ដាហ៍នេះថា ក្នុងរយៈពេលប៉ុន្មានថ្ងៃកន្លងមកនេះ ពួកគេបានកត់ត្រាការឆ្លងព្រំដែនរបស់ពលរដ្ឋស៊ីរីដែលរស់នៅក្នុងលីបង់ ១៥.៦០០ នាក់ និងពលរដ្ឋលីបង់ ១៦.១៣០ នាក់ ចូលទៅក្នុងទឹកដីស៊ីរី ។ ប្រភពសន្តិសុខស៊ីរីបានប្រាប់សារព័ត៌មានAFP ថាមនុស្សជាង២២.០០០នាក់ រួមទាំងជនជាតិលីបង់ជាង៧.០០០នាក់បានឆ្លងពីលីបង់ចូលទៅស៊ីរីក្នុងសប្តាហ៍នេះតាមរយៈច្រកព្រំដែនចំនួនពីរ៕