យោធាដែលកំពុងកាន់អំណាចរបស់សហភាពមីយ៉ាន់ម៉ា កាលពីថ្ងៃព្រហស្បតិ៍ (២៦ កញ្ញា) បានជំរុញឱ្យគូប្រជែងប្រដាប់អាវុធរបស់ខ្លួនបោះបង់ចោលនូវអ្វីដែលខ្លួនហៅថា “អំពើភេរវកម្ម” ហើយចូលរួមក្នុងដំណើរការនយោបាយនៅក្នុងការបោះឆ្នោតសកលនៅឆ្នាំក្រោយ នៅក្នុងការផ្សព្វផ្សាយដែលមិននឹកស្មានដល់មួយដល់សត្រូវ ដែលបន្ទាប់មកត្រូវបានបដិសេធយ៉ាងឆាប់រហ័ស។

មីយ៉ាន់ម៉ា បានជាប់គាំងក្នុងសង្គ្រាមស៊ីវិល ដោយរបបសឹកកំពុងប្រយុទ្ធនៅលើសមរភូមិមុខជាច្រើនប្រឆាំងនឹងចលនាតស៊ូប្រដាប់អាវុធ ហៅថា កងកម្លាំងការពារប្រជាជន PDF ដែលជាសម្ព័ន្ធមិត្តជាមួយក្រុមឧទ្ទាមជនជាតិភាគតិចជាច្រើនដែលមានប្រវត្តិជូរចត់ជាមួយយោធា។

រដ្ឋាភិបាលយោធាបាននិយាយក្នុងសេចក្តីថ្លែងការណ៍មួយថា “ដើម្បីសន្តិភាពដ៏អស់កល្បជានិរន្តរ៍ និងការអភិវឌ្ឍន៍រួមគ្នាជាមួយប្រជាជន ក្រុមប្រដាប់អាវុធជនជាតិភាគតិច ក្រុមភេរវករ និងកងកម្លាំង PDF ដែលប្រឆាំងនឹងរដ្ឋ គួរតែចាកចេញពីផ្លូវភេរវកម្មប្រដាប់អាវុធ ហើយយើងសូមអញ្ជើញពួកគេឱ្យចូលរួមក្នុងនយោបាយបក្ស និងផ្លូវបោះឆ្នោត”។

នេះគឺជាសំណើផ្សះផ្សារលើកដំបូងរបស់យោធាដល់គូប្រជែងរបស់ខ្លួន ចាប់តាំងពីរដ្ឋប្រហារឆ្នាំ២០២១មក ដែលធ្លាប់បានប្រឆាំងនឹងការអំពាវនាវអន្តរជាតិឱ្យចូលទៅក្នុងកិច្ចសន្ទនាជាមួយនឹងអ្វីដែលខ្លួនទទូចថាជាភេរវករបំផ្លាញប្រទេស។

ប៉ុន្តែរដ្ឋាភិបាលស្រមោលរួបរួមជាតិ NUG របស់មីយ៉ាន់ម៉ា បានច្រានចោលភ្លាមៗនូវការសំណើរបស់យោធាដល់សាខាប្រដាប់អាវុធរបស់ខ្លួនគឺកងកម្លាំង PDF មួយនោះ ដោយអ្នកនាំពាក្យ NUG និយាយថា ការផ្តល់ជូននេះមិនមានតម្លៃគួរឱ្យពិចារណាទេ ហើយថារបបសឹកពុំមានសិទ្ធិអំណាចក្នុងការរៀបចំការបោះឆ្នោតឡើយ៕